८ असोज, काठमाडौं । दुई उपहार गोलको मद्दतमा बार्सिलोनाले गिरोनालाई हराएको छ र स्पेनिस ला लिगामा लगातार छैठौं जित निकालेको छ ।
शनिबार भएको खेलमा बार्सिलोनाले ला लिगामा पहिलो सिजन खेलिरहेको गिरोनालाई ३–० गोल अन्तरले हराएको हो ।
बार्सिलोनाले दुई गोल उपहार पाएको थियो । घरेलु टोली गिरोनाका बेनिटेले १७ औं मिनेटमा आत्मघाती गोल गरे । दोस्रो हाफको सुरुमा नै इराजोजले आत्मघाती गोल गरेपछि बार्सिलोना २–० को अग्रता लिन सफल भयो ।
खेलको ६९ औं मिनेटमा लुइस स्वरेजले गोल गरे । जितसँगै लिग लिडर बार्सिलोनाको ६ खेलबाट १८ अंक भएको छ ।