पोर्चुगल । नेपाली नारी समाज, पोर्चुगलले प्रवासमा देउसी भैलो खेलेर संकलन गरेको रकम अनाथ आश्रमलाई सहयोग गरेको छ ।
समाजले सुनसरीको इटहरी –४, सयपत्री टोलमा रहेको निसहाय बालबालिका सेवा आश्रमलाई आर्थिक सहयोग गरेको हो । आश्रमका लागि सहयोगार्थ आयोजित देउसी भैलो कार्यक्रमबाट संकलित १ लाख ८९ रुपैयाँ आश्रमलाई सहयोग प्रदान गरिएको समाजकी अध्यक्ष सिता बरालले जानकारी दिइन् ।
सहयोग रकम आश्रमकी सञ्चालिका गीता गौतमलाई रेमिट्यान्समार्फत् पठाइएको हो ।
तिहारको अवसरमा समाजले पोर्चुगलमा रहेका प्रवासी नेपालीहरुबाट सहयोग रकम संकलनका लागि घरदैलो देउसी भैलो अभियान नै सञ्चालन गरेको थियो ।
गौतमले अनाथ र असहाय बालाबालिकाहरुको सेवा गर्ने उद्देश्यले ०४१ सालमा आफ्नै प्रयास र लगानीमा उक्त आश्रम सञ्चालनमा ल्याएकी थिइन् ।
