१७ मंसीर, सप्तरी। संघीय समाजवादी फोरम नेपालका अध्यक्ष उपेन्द्र यादवले आफूलाई लक्षित गरी बम प्रहार गराउने व्यक्तिलाई आफूले चिनेको बताएका छन् । यद्यपि अहिले उनको नाम सार्वजनिक नगर्ने उनको भनाइ छ ।
राजपा अध्यक्ष मण्डलका सदस्य तथा धनुषा क्षेत्र नम्बर ३ का उम्मेदवार राजेन्द्र महतोको धनुषाको फूलगामास्थित चुनावी सभामा सहभागी भएर राजविराजतर्फ फर्किने क्रममा अध्यक्ष यादवलाई लक्षित गरेर शनिबार साँझ बम प्रहार गरिएको थियो ।
बम यादव सबार गाडी भन्दा केहि मिटर पर पडिकएकाले उनी सुरक्षित छन् । ‘बम कसले राखेको भन्ने थाहा छ’ अध्यक्ष यादवले भने, ‘शंका, उप शंका मात्रै होइन, बिष्फोट गराउने मान्छेलाई चिन्छु । चुनावपछि नाम सार्वजनिक गर्छु ।’
राजेन्द्र महतोको चुनावी सभामा नजान धेरै नै रोक्ने प्रयास भएको बताउँदै अध्यक्ष यादवले भने, ‘फोनबाट पनि र प्रत्यक्ष रुपमा पनि सभामा नजान धेरै प्रयास गरियो । तर, गठबन्धनमा जाने मेरो नैतिक जिम्मेबारी भएकाले गएँ । त्यसै कारण बिष्फोट गराइएको हो ।’
‘मुलुकमा राज्य पक्ष भएको देखिएको छैन्’ उनले भने, ‘जब मैले यसको अनुभूति गरिरहेको छु भने जनताले के अनुभूति गर्ला ?’