२४ मंसिर, हेटाैंडा। मकवानपुर क्षेत्र नम्बर २ बाट नेकपा एमालेका बिरोध खतिवडा विजयी भएका छन् । उनले कांग्रेसकी नेतृ महालक्ष्मी डिना उपाध्यायलाई ११ हजार ९६३ मतले हराउँदै खतिवडा विजयी भएका हुन् ।
खतिवडाले ४४ हजार ७ सय ४४ मत ल्याए । पराजित भएकी डिनाले ३२ हजार ६ सय ८१ मत ल्याइन् । योसँगै उनी चौंथोपटक सांसद बनेका छन् । उनी १८ वर्षपछि फेरि संसदमा फर्किएका छन् ।
उनी ०४३ सालमा राष्ट्रिय पञ्चायतमा एमालेका तर्फबाट जनपक्षीय उम्मेदवार बनेका थिए । तर, हारे । त्यसपछि उनी ०४८ सालमा जनमुखी नेता रुपचन्द्र बिष्टलाई पराजित गर्दै सांसद बने । ०५१ को मध्यावधि निर्वाचनमा खतिवडाले कमल थापालाई हराए ।
०५१ सालको मध्यावधि चुनावमा पनि खतिवडाले डिनाको नै सामना गरेका थिए । तर, कांग्रेस सो चुनावमा तेस्रो भएको थियो । ०५६ सालको चुनावमा पनि खतिवडाले तत्कालीन माले नेता हरिण्यलाल श्रेष्ठलाई हराएका थिए ।
