बिहीबार, ६ वैशाख, २०७५
OnlineKhabar.com

ट्यांकरबाट चलानभन्दा कम भरिन्छ तेल !

केशवचन्द्र महरा/रासस 


२९ पुस, डोटी । नेपाल आयल निगमबाट चलान भएर आउने टयांकरमा पेट्रोलियम पदार्थ कम निस्कँदै आएको छ । व्यवसायीका अनुसार निरन्तर रुपमा प्रतिट्यांकर चार प्रतिशतभन्दा बढी पेट्रोलियम पदार्थ निस्किरहेको छ जसले आफूहरुलाई मर्का परिरहेको व्यवसायीको गुनासो छ ।

“म प्रत्येक पटक पेट्रोल उठाउँदा छ हजार लिटरको भुक्तानी दिएर चलान मगाउँछु । आयल निगमले पनि छ हजारकै बिल बनाउँछ”, दिपायल सिलगढी नगरपालिका–५ स्थित एसजी फ्युल सेन्टरका सञ्चालक प्रेमबहादुर भण्डारीले भने, “तर प्रत्येक पटक हामीले डिप लिँदा २०० देखि ३०० लिटर कम आउँछ जुन रकममा ठूलै हुन आउँछ ।” यस्तै समस्या डिजलमा पनि रहेको तर पेट्रोलमा बढी रहेको उनले बताए ।

अछाम साँफेबगरस्थित इन्द्रसरा आयल स्टोरका सञ्चालक भीमबहादुर कुँवरले आफूले उठाउने १२ हजार लिटरमा निरन्तर ५०० लिटर बाटामै हराउने बए । उनले भने, “लैजाँदा १२ हजारको रकम तिरेर लैजान्छाँै तर हाम्रो ट्यांकीमा ११ हजार ५०० भन्दा बढी झर्दै झर्दैन ।”

निगमका कर्मचारी र ट्यांकरका चालकको मिलेमतोमा यस्तो समस्या आइरहेको व्यवसायीको आरोप छ । “आयल निगमकै कर्मचारी नै ट्यांकरका चालकसँग मिलेका हुन्छन् । बाटोमै बेचेर हामीलाई कम तेल थमाउँछन्”, व्यवसायी भण्डारीले भने, “आयल निगमले तापक्रमको समस्यालगायतका अनेकन प्राविधिक समस्या देखाएर हामीलाई बाध्य पार्छन् ।”

निगम शाखा कार्यालय दिपायल र जिल्ला प्रशासन कार्यालय डोटीमा निवेदनसमेत दिइएको व्यवसायी भण्डारी बताउँटन् । “पटक पटक निवेदन दिएको छु । जानकारी गराएको छु, कुनै प्रतिक्रिया नै आउँदैन”, उनले भने । निरन्तर समस्या आउन थालेपछि उनले दुई सातायता पेट्रोलको माग गर्नुभएको छैन जसले गर्दा डोटीमा पेट्रोलको हाहाकार शुरु भएको छ । भण्डारीको पेट्रोल पम्प डोटीको एक मात्र पेट्रोल बेच्ने पम्प हो । त्यसैले डोटीमा व्यापक समस्या उब्जिएको छ ।

अछामका व्यवसायी कुँवर पनि यही अवस्था रहे पेट्रोल नबेच्ने निर्णयमा पुगेको बताउँ । “घरखेत बेचेर सेवा गर्न सकिँदैन । मुनाफाका लागि काम गर्ने हो”, उनले भने, “हाम्रो मुनाफा ट्यांकर चालक र आयल निगमका कर्मचारीले बाटोमै खाइदिन्छन् । अनि कसरी व्यवसाय गर्ने ?”

तापक्रम समस्या

तापक्रमअनुसार पेट्रोलियम पदार्थको आयतनमा तलमाथि हुन्छ । सोही कुरालाई आधार बनाएर निगमले ट्यांकर चालकलाई बचाउँदै आफूहरुलाई घाटामा फसाइरहेको व्यवसायीको आरोप छ ।

“डिजलमा त केही राहत छ तर पेट्रोल धनगढीबाटै लोड भएर आउँछ जसमा १ डिग्री मात्रै तापक्रम कम हुँदा ट्यांकरमा १५ लिटर कम भए हाम्रा टाउकामा हाल्छन्”, व्यवसायी भण्डारी भने, “सोही कुरालाई आधार बनाएर हामीलाई फसाउँदै आएका छन् ।” यस्तै अवस्थामा धनगढीमा लोड हुँदाको तापक्रमभन्दा यताको तापक्रम १०/१५ डिग्री तल देखाएर आफूलाई फसाउने गरेको व्यवसायीको आरोप छ । स्रोतका अनुसार बाटामा ट्यांकर चालकले १५० लिटरसम्म गरेको बदमासी सहजै लुक्छ । त्यसभन्दा माथिको तापक्रमलाई हवाला दिएर उम्काउन सकिन्छ ।

निगमको दिपायलस्थित शाखा कार्यालयका प्रमुख निरन मगरातीले यस्तो समस्या तापक्रमकै कारणले सिर्जना भइरहेको बताउनुहुन्छ । “तापक्रमले पेट्रोलियम पदार्थको आयतनलाई तलमाथि पार्छ”, उनले भने, “आजभोलि चिसोको मौसम चलिरहेकाले झन् समस्या देखिन्छ ।”

व्यवसायीले उठाएको समस्या दिपायल शाखाबाट समाधान गर्न कठिनाइ रहेको उनी बताउँछन् । “हामीसँग भण्डार नभएकाले समस्या भएको हो । स्टोरेज नभएकाले हामी पेट्रोलको ट्यांकर धनगढीबाटै मगाएर पम्पलाई आपूर्ति दिन्छौँ । जसमा तापक्रमको समस्याले आउने समस्या उहाँहरुले नै जिम्मा लिनुपर्ने हुन्छ ।” तापक्रमबाहेकले आउने कमीलाई ट्यांकर चालकबाटै भराउने गरेको उनले जिकिर गरे ।

२०७४ पुष २९ गते ११:२० मा प्रकाशित

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

यसमा तपाइको मत




फेसबुकबाट तपाईको प्रतिक्रिया

Also you may like this