चलचित्र ‘६ एकान ६’मा काम गर्दा हाँस्य कलाकारहरु दीपकराज गिरी, दीपाश्री निरौला, जितु नेपाल, केदार घिमिरे लगायतलाई चलचित्रको पर्दामा चलिन्छ कि चलिदैन भन्ने नै थाहा थिएन । हाँस्य सिरियलमा एउटा क्रेज बनाएका उनीहरु ठूलो पर्दामा दर्शकले रुचाउँछन् कि रुचाउँदैनन् भन्ने दोसाधमा थिए ।
तर, चलचित्र ‘छक्का पन्जा २’ रिलिजसम्म आइपुग्दा उनीहरुको पिर मात्र हटेको छैन, नेपालकै महंगा कलाकार, निर्माता, निर्देशक समेत बनिसकेका छन् ।
दीपाश्री नेपालकै सबैभन्दा धेरै पैसा कमाउने चलचित्रकी निर्देशक बनिसकेकी छिन् ।
दीपकराज गिरी चलचित्र लेखन, अभिनय, निर्माणमा सफल ठहरिएका छन् । ‘छक्का पन्जा’कै ब्रान्डले हाँस्य सिरियलमा ‘माग्ने बुढा’को नामले परिचित केदार घिमिरे धनाढ्य कलाकार भैसकेका छन् । अर्कोतिर, ‘मुन्द्रे’ नामले परिचित जितु नेपाल महंगो पारिश्रमिक लिने कलाकार भैसकेका छन् ।
नायिका पूजा शर्मा र सुदर्शन थापाले निर्माण गर्न लागेको नयाँ चलचित्रका लागि केदार घिमिरे १० लाख पारिश्रमिक लिएर अनुवन्धित भएका छन् भने जितु नेपालले ७ लाख पारिश्रमिक लिएका छन् ।
जितु र केदारलाई यति महंगो कलाकार ‘छक्का पन्जा’कै ब्रान्डले बनाएको हो । यता, नायिका प्रियंका कार्की अन्य ब्यानरका चलचित्रमा निरन्तर असफल भएपनि ‘छक्का पन्जा’मा निरन्तर काम गरिरहेकाले चर्चामा छिन् । प्रियंका कार्कीको स्टारडम घटेको छैन । उनले अभिनय गरेको पछिल्लो चलचित्र ‘बटरफ्लाई’ असफल भएतापनि उनलाई ‘छक्का पन्जा’ले बचाएको छ । सायद, यहि भएरै होला उनी यो ब्रान्डमा आमाको भूमिकामा काम गर्न पनि तयार छिन् ।
एउटा चलचित्र रिलिज हुँदा त्यसले सकारात्मक, नकारात्मक दुबै प्रतिक्रिया पाउँछ । तर, त्यसको पछाडि जोडिएका चलचित्रकर्मी करिअरमा भने धेरै फेरबदल ल्याइदिन्छ ।
