२८ माघ, काठमाडौं । राष्ट्रियसभा सदस्यका लागि मन्त्रिपरिषदले सिफारिस गरेको तीन नाममा राष्ट्रपति विद्यादेवी भण्डारीले असन्तुष्टि जनाएकी छन् । दलहरुसँग छलफल नगरी सिफारिस गरिएको भन्दै राष्ट्रपतिले सिफारिस गरिएका नामहरुप्रति असन्तुष्टि व्यक्त गरेकी हुन् ।
शुक्रवारको मन्त्रिपरिषद बैठकले कृष्णप्रसाद पौडेल, गोपाल बस्नेत र चाँदनी जोशीको नाम राष्ट्रियसभामा मनोनयन गर्न राष्ट्रपतिसमक्ष सिफारिस गरेको थियो । तर राष्ट्रपतिले दलहरुसँग परामर्श नगरी नामहरु सिफारिस गरेको भन्दै ती नामहरुप्रति असन्तुष्टि जनाएकी छन् ।
संविधान अनुसार मन्त्रिपरिषदको सिफारिसमा राष्ट्रपतिले तीन सदस्य मनोनयन गर्ने व्यवस्था छ । राष्ट्रियसभाका ५९ मध्ये ५६ जना निर्वाचित भइसकेका छन् । शनिबार विदा भएकाले मन्त्रिपरिषदको सिफारिसको बारेमा अध्ययन गर्न बाँकी रहेको राष्ट्रपति कार्यालयका एक उच्च अधिकारीले बताए ।
वामपन्थी गठबन्धनले अत्यधिक बहुमत पाएर सरकार गठन गर्न लागेका बेला कांग्रेसले एकलौटी रुपमा तीनजनाको सिफारिस गरेकाले तीनै व्यक्तिलाई राष्ट्रपतिले तत्काल मनोनयन गर्ने सम्भावना नरहेको स्रोतले जनाएको छ । राष्ट्रपतिले आवश्यक परामर्शपछि यसबारे निर्णय हुने ती अधिकारीले बताए ।
‘नाम सिफारिस भएर आएको छ तर यसबारे परामर्श बाँकी छ’ ती अधिकारीले अनलाइनखबरसँग भने, ‘यसबारे पर्याप्त छलफल गरेपछि मात्रै राष्ट्रपतिले मनोनयन गर्नुहुनेछ ।झ्
राष्ट्रपतिका एक सल्लाहकारले भने–वाम गठबन्धनले यत्रो बहुमत पाएको छ । दलहरुबीच छलफल गरेर सहमतिका आधारमा नाम सिफारिस गरेको भए राष्ट्रपतिज्यूलाई सजिलो हुने थियो । तर कतै छलफल र सहमति नगरी ‘खाए खा नखाए घिच’ भन्ने शैलीमा गरिएको सिफारिसमाथि परामर्श नगरी मनोनयन हुने सम्भावना छैन ।’
सरकारले सिफारिस गरेका नाम केही समय परामर्शमै रहने र नयाँ सरकार बनेपछि नयाँ जनादेश अनुसारको सिफारिस हुन सक्ने स्रोतको दाबी छ । ‘तीन जनाको मनोनयनले सरकार गठनमा कुनै असर गर्दैन, केही समय परामर्श हुँदैगर्छ, दलहरुबीच पनि परामर्श होला’, स्रोतले भन्यो ।
सरकारले सिफारिस गरेकामध्ये पौडेल कांग्रेस केन्द्रीय कार्यालयका मुख्य सचिव हुन् भने बस्नेत कांग्रेसका झापा जिल्लाका पूर्व सचिव हुन् । जोशी अन्तर्राष्ट्रिय गैर सरकारी संस्थामा काम गरेकी महिला हुन् ।
