२४ चैत, धनगढी । कैलालीको धनगढीमा चारवटा पार्टीले निकालेको जुलसमा प्रहरीले हस्तक्षेप गर्दा १६ जना घाइते भएका छन् ।
धनगढीको ट्राफिक चौराहामा नेकपा माओवादी केन्द्र, राष्ट्रिय जनमोर्चा, मोहन वैद्य नेतृत्वको नेकपा क्रान्तिकारी माओवादी र नेत्रविक्रम चन्द नेतृत्वको नेकपाले संयुक्त रुपमा गरेको प्रदर्शनमा प्रहरीले लाठीचार्ज गरेको थियो ।
जनआन्दोलन दिवसको अवसर पारेर उनीहरुले प्रदर्शन गरेका थिए । २०४६ साल चैत २४ गते संयुक्त जनआन्दोलन संयोजन समितिले आन्दोलन सुरु गरेको थियो ।
नेपालका धेरैजसो कम्युनिस्ट पार्टीले यसै दिनलाई जनआन्दोलन दिवसको रुपमा मनाउँदै आएका छन् ।
अछाममा पनि झडप
नेत्रविक्रम चन्द विप्लव नेतृत्वको नेपाल कम्युनिष्ट पार्टीका कार्यकर्ता र प्रहरीबीच शनिबार अछाम सदरमुकाम मंगलसेनमा सामान्य झडप भएको छ ।
नेकपाले खुलामञ्चमा आयोजना गरेको आमसभालाई प्रहरीले माथिको आदेश अनुसार भन्दै रोक्न खोजेपछि झडप भएको हो । झडपमा नेकपाका केन्द्रीय सदस्य रामप्रसाद तिमिल्सेना (राप्ती), जनस्वयमसेवकका सेती महाकाली प्रमुख धनबहादुर मल्ललगायत मञ्चबाट भागेका थिए ।
कार्यक्रम रोक्न भन्दै प्रहरी अधिकारी मञ्चतिर जाने बेलामा मञ्चबाट उनलाई कुर्सी प्रहार भएपछि झडप भएको प्रत्यक्षदर्शीले बताएका छन् ।
यता रुपन्देहीको बुटवलमा भने नेकपाले शान्तिपूर्ण रुपमा आमसभा गरेको छ ।
यो पनि पढ्नुहोस्
