बलिउडका रियल कपल रणवीर सिंह र दिपिका पादुकोणको चाँडै बिहे हुन लागेको खबर केही समयदेखि फैलिइरहेको छ । तर, उनीहरु स्वयम्ले यसबारे आधिकारिक रुपमा केही बोलेका थिएनन् । उनीहरुले त अहिलेसम्म आफूहरु प्रेममा रहेकेा सार्वजनिकरुपमा स्वीकारेकासम्म थिएनन् ।
हालै एउटा अन्तरवार्तामा रणवीरलाई दिपिकासँगको प्रेमको विषयमा प्रश्न गरियो । जवाफमा उनले आफूहरु अफेयरमा रहेको पहिलोपटक स्वीकार गरे । बिहेको विषयमा पनि उनले केही कुरा भने ।
‘हो हामी रिलेसनसीपमा छौं,’ उनले भने, ‘विवाहको विषयमा पनि सोचिरहेका छौ ।’ सञ्चारमाध्यममा आएका विवाहसम्वन्धी खबरहरुलाई उनले अफवाहको संज्ञा दिएका छन् । रणवीरका अनुसार दुवैजना अहिले आफ्नो करिअरमा फोकस भएको हुनाले तत्काल बिहे हुने सम्भावना छैन ।
‘दिपिका अहिले ढाडको समस्याले पिडित भइरहेकी छिन्, उनलाई ठिक त हुन दिनुस,’ रणवीरले भने ।
रणवीर र दिपिका फिल्म ‘गोलियोँ कि रासलीलाः रामलीला’ मा काम गर्दा एक-अर्कासँग नजिकिएका थिए । पछिल्लो समय पद्मावतमा उनीहरुले सँगै काम गरे । यो फिल्म सुपरहिट भएको छ । फिल्मले रणवीर र दिपिका दुवैको करिअरलाई नयाँ उचाई दिएको छ ।
