१० वैशाख, काठमाडौ । नुवाकोटमा निर्माणाधिन माथिल्लो त्रिशुली थ्रीए जलविद्युत आयोजनाको ७४ प्रतिशत काम सकिएको छ । नेपाल विद्युत प्राधिकरणले निर्माण गरिरहेको यो आयोजनाबाट आगामी आर्थिक वर्ष ०७५/७६ को अन्त्यसम्म विद्युत् उत्पादन गर्ने लक्ष्यसहित काम अघि बढाएको छ ।
आयोजना प्रमुख फणिन्द्रराज जोशीका अनुसार अहिले सुरुङको पिँधमा कन्क्रिटिङ गर्ने काम भइरहेेको छ । ६० मेगावाट क्षमताको यो आयोजनाको निर्माण ०७२ बैशाखको भूकम्पका कारण प्रभावित बनेको थियो ।
भूकम्पपछिको ड्यामेज एसेसमेन्ट गरेर अहिले दुईवटा गेटको मर्मतको काम पनि अन्तिम चरणमा पुगेको छ ।
भूकम्पका कारण पहुँचमार्ग बिग्रेपछि निर्माण कम्पनी चाइना गेजुवा ग्रुप अफ कम्पनी (सीजीजीसी)ले काम अघि बढाउन सकेको थिएन । नेपाली सेनाले पहुँच मार्ग निर्माण गरिदिएपछि सीजीजीसीले निर्माणको काम द्रुत रुपमा अघि बढाएको छ ।
गत असोजमा समयसीमा भन्दा ४ दिनअघि निर्माण कम्पनीले सुरुङ खन्ने काम सकेको थियो । ४.०७६ किमी लामो सुरुङमध्ये भूकम्प आउनुअघि ३.८९ किमी खनिसकिएको थियो ।
चिनियाँ एक्जिम बैंकको आठ अर्ब ९० करोड ऋणमा निर्माण हुन लागेको यो आयोजनालाई आउँदो असारसम्म जसरी पनि सक्न जलस्रोत, उर्जा तथा सिँचाई मन्त्रालयले निर्देशन दिएको छ ।
ट्रान्समिसन लाइनमा स्थानीयको अवरोध
आयोजनास्थलमा निर्माणको काम द्रुत गतिमा अघि बढे पनि ट्रान्समिसन लाइन निर्माणको काम भने सन्तोषजनक देखिँदैन । स्थानीयहरुसँगको मुआब्जा विवादका कारण कैयन स्थानमा आयोजनाले ट्रान्समिसन लाइन निर्माणका लागि फाउन्डेसनको काम समेत सुरु गर्न सकेको छैन ।
नुवाकोटमा निर्माणाधीन यो आयोजनाले १४२ वटा टावरको निर्माण गर्नुपर्छ, जसमध्ये ७० वटा टावर ठडिइसकेका छन् । यी टावरसहित ११० वटा टावरको फाउण्डेसनको काम पनि सकिएको छ । साथै थप १० वटा टावरमा अहिले फाउण्डेसनको काम भइरहेको छ ।
स्थानीयहरुले सरकारले निर्धारण गरेको मुआब्जामा चित्त बुझाएका छैनन् । ०७० सालमै सरकारले उक्त क्षेत्रको मुआब्जाको टुंगो लगाएको भए पनि स्थानीयहरुले अहिलेसम्म रकम बुझ्न मानेका छैनन् ।
जसका कारण आयोजनाबाट विद्युत उत्पादन सुरु हुँदासम्म पनि प्रसारण लाइनको निर्माण नसकिने हो कि भन्ने चिन्ता बढेर गएको छ ।
‘शान्तिबजारदेखि त्रिशुली थ्री-बी हबसम्मको भागमा १३२ केभीका ६ वटा टावर ठड्याउनुपर्छ, जुन स्थानीयको विरोधका कारण फाउण्डेसनको कामसमेत सुरु गर्न सकेका छैनौं’ जोशीले भने ।
स्थानीय निकायका जनप्रतिनिधिहरुसँग पनि आयोजनाले मुआब्जाको विषयमा पटक-पटक छलफल गरिरहेको छ । तर, स्थानीयहरु भने सरकारले निर्धारण गरेेको मुआब्जामा चित्त बुझाउने कुनै छाँटकाँट नै देखाएका छैनन् ।
थानकोटमा रहेको पात्लेवन रिसोर्टले पनि आफ्नो क्षेत्रमा टावर ठड्याउन मानिरहेको छैन । बाणभञ्ज्याङदेखि मातातीर्थसम्मको भागमा पर्ने यो क्षेत्रमा १६ वटा टावर ठड्याउनुपर्छ । जसमध्ये ४१.५ नम्बरको उक्त टावर निर्माण गर्न रिसोर्टले रोकिरहेको छ ।
आयोजना प्रमुख भन्छन् ‘४१.४ नम्बरको टावर निर्माण गरिसक्यौं, ४१.६ को निर्माण सुरु गर्न लागेका छौं, अब पात्लेवन रिसोर्टले मुआब्जा बुझ्नैपर्छ, यसरी रोकेर बस्न पाइँदैन ।’