शुक्रबार, ११ जेठ, २०७५
Ruslan
OnlineKhabar.com
Suzuki

काठमाडौंको पानीमा ३ सय प्रतिशत कोलिफर्म, नपिउन विज्ञको सुझाव

Suzuki
अनलाइनखबर


२५ वैशाख, काठमाडौं । आज मंगलबार, राजधानीबाट प्रकाशित राष्ट्रिय दैनिक पत्रिकाहरुको प्राथमिकतामा विविध विषय परेका छन् । केहीले अपराधका विषयलाई पहिलो प्राथमिकतामा राखेका छन् भने कुनैकाे जाेड राजनीतिक विषयमा छ ।

भारतीय प्रधानमन्त्री नरेन्द्र मोदीले यही वैशाख २८ गतेबाट गर्न लागेको नेपाल भ्रमणलाई आजका पत्रपत्रिकाहरुले विभिन्न शीर्षकमा लेखेका छन् । विशेष गरी भ्रमणका क्रममा हुने सम्झौताबारे पत्रपत्रिकाले जानकारी पस्केका छन् । समाचार अनुसार रेलमार्ग निर्माणबारे सम्झौता हुने सम्भावना छ ।

हिन्दू धर्मगुरु आचार्य श्रीनिवासले धार्मिक उक्साहटका लागि आफूमाथि नै गोली हान्न लगाएकोलाई पनि आजका पत्रपत्रिकाहरुले उत्तिकै महत्त्वका साथ छापेका छन् । सप्ताह पुराण वाचनका लागि आचार्यमाथि गत चैत २५ गते गोली प्रहार भएको थियो । अनुसन्धानका क्रममा उनले आफैंमाथि गोली हान्न लगाएको खुलेको हो ।

यसका अतिरिक्त उपत्यकाको पानी पिउनै अयोग्य भएको, रोजेको सामुदायिक विद्यालयमा ६० प्रतिशत विद्यार्थीले भर्ना नपाएको, सिन्डिकेट हटाउन व्यवसायी पनि सहमत भएकोलाई आजका पत्रपत्रिकाहरुले महत्त्वका साथ स्थान दिएर लेखेका छन् ।

मोदीको भ्रमणमा रेलमार्ग सम्झौता हुने

भारतीय प्रधानमन्त्री नरेन्द्र मोदीको दुईदिने राजकीय भ्रमणका क्रममा यसअघि प्रधानमन्त्री केपी शर्मा ओलीको भारत भ्रमणका क्रममा भएका जलमार्ग, रेलमार्ग र कृषिमा साझेदारीसम्बन्धी सहमतिलाई सम्झौतामा परिणत गरिने भएको समाचार कान्तिपुर दैनिकले छापेको छ ।

वैशाख २८ मा नेपाल आउन लागेका मोदी र ओलीले ती समझदारी र सम्झौतामा हस्ताक्षर गर्ने जानकारी परराष्ट्रमन्त्री प्रदीप ज्ञवालीले दिएको कान्तिपुरको समाचारमा उल्लेख छ ।

कान्तिपुर जस्तै अन्नपूर्णले पनि माेदीकाे नेपाल भ्रमणबारे लेखेकाे छ । अन्नपूर्णका अनुसार माेदीकाे नेपाल भ्रमणमा डुबान समस्या उठाउने नेपाली तयारी छ ।

मोदीलाई रक्षामन्त्री ईश्वर पोखरेलले जनकपुर विमानस्थलमा स्वागत गर्ने भएको समाचार नयाँ पत्रिकामा छ ।

पौडेल पक्षले डाक्यो छुट्टै भेला, देउवाविरुद्ध सशक्त उत्रने तयारी

कांग्रेस वरिष्ठ नेता रामचन्द्र पौडेल पक्षले सभापति शेरबहादुर देउवा पार्टी विधान र सहमतिविपरीत चलेको भन्दै सशक्त प्रतिरोध गर्ने तयारी गरेको छ ।

पूर्वमहामन्त्री प्रकाशमान सिंहको निवासमा आइतबार ४ नेताबीच भएको छलफलमा पदाधिकारी मनोनयन प्रक्रिया र भावी रणनीतिलगायत विषयमा छलफल भएको कान्तिपुर दैनिकमा समाचार छ ।

सिंह निवासमा वरिष्ठ नेता पौडेल, सिंह, केन्द्रीय सदस्य अर्जुननरसिंह केसी र नवीन्द्रराज जोशीबीच छलफल भएको हो । समाचार अनुसार सभापति शेरबहादुर देउवाको कदमविरुद्ध सशक्त उत्रने तयारी पौडेल पक्षको छ ।

काठमाडौंको पानीमा कोलिफर्मको मात्रा ३ सय प्रतिशत, नपिउन विज्ञको सुझाव

अन्नपूर्ण पोस्ट दैनिकले आज काठमाडौंको खानेपानी शुद्धताबारे एक समाचार छापेको छ । समाचार अनुसार उपत्यकाको पानी पिउन योग्य नभएको परीक्षणका क्रममा पुष्टि भएको छ ।

नेपाल विज्ञान तथा प्रविधि प्रज्ञा प्रतिष्ठान (नास्ट)ले काठमाडौं उपत्यकाका पानीका विभिन्न स्रोतको परीक्षण गर्ने क्रममा यस्तो तथ्य फेला परेको बताइएको छ ।

समाचार अनुसार काठमाडौंको पानीमा ब्याक्टेरिया, आइरन, आमोनिया र नाइट्रेटको मात्रा धेरै पाइएको छ ।

रोजेका सामुदायिक विद्यालयमा ६० प्रतिशत विद्यार्थीले भर्ना पाएनन्

सरकारले विद्यार्थी भर्ना अभियानलाई उत्साहपूर्वक अघि बढाइरहेका बेला रुपन्देहीमा उत्कृष्ट ठहरिएका सामुदायिक विद्यालयमा ६० प्रतिशत विद्यार्थीले भर्ना नपाएको खबर नयाँ पत्रिकाले लेखेको छ ।

समाचार अनुसार उत्कृष्ट नतिजा ल्याएर स्थापित भएका सामुदायिक विद्यालयमा भर्नाका लागि आवेदन दिएका ६० प्रतिशतले भर्ना नपाएका हुन् ।

अझै ७५०० कर्मचारी अपुग

देशभरका ७ सय ५३ स्थानीय तहमा अझै ७ हजार ५ सय अप्राविधिक कर्मचारी अपुग भएका छन् । स्थानीय तहको कर्मचारी संगठन संरचनाअनुसार १८ हजार ३४ अप्राविधिक दरबन्दी रहेकोमा १० हजार ५ सय ३४ जनाले मात्रै प्रशासनिक काम सञ्चालन गरिरहेका छन् ।

कान्तिपुरका अनुसार संघीय मामलिा तथा सामान्य प्रशासन मन्त्रालयले कर्मचारी रिक्त दरबन्दीको विवरण संकलन गरेको छ । संगठन संरचनाअनुसार प्राविधिक र अप्राविधिक गरी स्थानीय तहमा ३७ हजार २ सय ५७ कर्मचारी आवश्यक पर्छ ।

र, यो पनि- इँटा भट्टामै विद्यार्थी भर्ना

सरकारले विद्यार्थी भर्ना अभियान सञ्चालन गरिरहेका बेला धादिङमा इँटा भट्टामै पुगेर विद्यार्थी भर्ना गरिएको छ ।

अन्नपूर्ण पोस्ट दैनिकको समाचार अनुसार, इँटा उद्योग बालश्रम मुक्त बनाउन र मजदुरका बालबालिकालाई विद्यालय शिक्षा दिलाउन उद्योगमै भर्ना अभियान चलाइएको हो ।

‘इँटा उद्योगमा कार्यरत मजदुरका बालबालिकालाई भर्ना गरी उद्योग परिसरमै पढ्ने व्यवस्था मिलाइएको छ’ अन्नपूर्णले आफ्नो समाचारमा लेखेको छ ।

हेर्नुहाेस् अाजका पत्रपत्रिकाका फ्रन्टपेज

२०७५ वैशाख २५ गते ६:४० मा प्रकाशित

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

यसमा तपाइको मत




फेसबुकबाट तपाईको प्रतिक्रिया

Also you may like this