बिहीबार, १० जेठ, २०७५
Ruslan
OnlineKhabar.com
Suzuki

दलित विद्यार्थी भर्ना नगरेपछि झापाको संस्कृत विद्यालयमा तालाबन्दी

Suzuki
अनलाइनखबर

३ जेठ, झापा । झापाको भद्रपुरमा रहेको संस्कृत विद्यालय श्री कृष्ण दै्रपायन गुरुकुल बेद विद्या श्रमले दलित विद्यार्थीलाई भर्ना नगरेपछि तालाबन्दी गरिएको छ ।

इलाम नगरपालिका–५ बर्वोटेका विकास कार्की डोलीलाई गुरुकुलले भर्ना लिन नमानेपछि नेपाल राष्ट्रिय उत्पीडित विद्यार्थी संगठनले विहीबार गुरुकुलमा तालाबन्दी गरेको हो ।

संगठनका केन्द्रीय अध्यक्ष टिकाराम मंग्रातीका अनुसार कार्की डोलीलाई बिर्तामोडका भूवन भट्टराईले भर्नाका लागि गुरुकुल पु¥याएका थिए । भर्नाका लागि गुरुकुलमा पुगेका उनले संस्कृत विद्यालयको प्रशासनलाई आग्रह गर्दा भर्ना लिन अस्वीकार गरेका थिए ।

सो घटना सार्वजनिक भएपछि झापा जिल्लामा रहेका दलित अधिकारकर्मीले बालबालिकाको मौलिक हकलाई हनन् नगर्न आग्रह गर्दा पनि गुरुकुलले विद्यार्थी भर्ना गर्न नमानेको अध्यक्ष मंग्रातीले बताए ।

हाम्रा बटुकहरु हरेक दिन धार्मिक कार्यक्रममा सहभागी हुनुपर्ने भएकोले दलित विद्यार्थीको संलग्नता व्यवहारिक रुपमा समाजले स्वीकार्दैन- गुरूकुल प्रशासन

छलफल निष्कर्षबिहीन

गुरुकुलले दलित विद्यार्थीलाई संस्कृत विद्यालयमा भर्ना लिन नमानेपछि जातीय विभेद गरेको निष्कर्ष निकाल्दै विभिन्न संघ संगठनले दुवै पक्षबीच छलफल गरेर समाधान निकाल्ने प्रयास गरेको थियो ।

बिहीबार विद्यार्थी संगठन, दलित अधिकारकर्मी, युवा संघ नेपाल, अनेरास्ववियू र गुरुकुल सञ्चालक समितिबीच समाधानको लागि छलफल गरिएको थियो ।

छलफलमा युवा संघ नेपालका केन्द्रीय सदस्य त्रिलोचन सापकोटाले भर्नाका लागि पुगेका विद्यार्थीलाई भर्ना गर्न अस्वीकार गर्नु जातीय विभेद भएको बताएका छन् ।

उनले नेपालको संविधानमा जातीय विभेद गर्नु सामाजिक अपराध भएको उल्लेख गरे । समाज रुपान्तरणको अभियानमा जातीय विभेद् गलत संस्कार भएको उनको ठहर छ ।

‘तत्काल विद्यार्थीलाई पठनपाठनको वातावरण सिर्जना गरियोस् । हिन्दु धर्ममा यसरी विभेद् हुनुले लज्जाबोध भएको छ’, सापकोटाले थपे, ‘धर्मभित्रको यस्ता कुसंस्कारकै कारण सर्वसाधारण नागरिक धर्म परिवर्तन गर्न बाध्य भएका हुन् ।’

यस्तै, दुई पक्षबीचको छलफलमा बोल्दै हल्दिबारीका अगुवा मोहन रेग्मीले संविधान अनुसार गुरुकुल सञ्चालन गर्नुपर्ने बताए । गुरुकुल सञ्चालनका निम्ति बनाइएका नीति नियम संविधान विपरित भए परिवर्तन गर्नुपर्ने उनको धारणा छ ।

झापा जस्तो जिल्लामा जातीय विभेद् हुनु दुःखद् भएको भन्दै रेग्मीले मुलुकमा परिवर्तन भएको सन्देश दिन गुरुकुलमा सबै जातजातिका विद्यार्थीलाई शिक्षा आर्जन गर्ने वातावरण तयार गर्नुपर्ने बताए ।

गुरुकुल सञ्चालक समिति अध्यक्ष राजेन्द्र चापागाईले अहिलेसम्म दलित विद्यार्थी भर्ना गर्नका लागि कोही नआएकाले यस्तो अभ्यास नगरेको प्रतिक्रिया दिए । उनले विधानमा व्यवस्था भए अनुसार गुरुकुल सञ्चालन गर्नुपर्ने भएकाले भर्ना लिन समस्या भएको बताए ।

समाधान निकाल्न छलफल गरिएपनि अध्यक्ष चापागाईले विभिन्न तर्क गर्दै भर्ना लिन नसकिने संकेत गरे । उनले दलित विद्यार्थीलाई यहाँ पठन पाठनका लागि वातावरण बनाइएपनि सामाजिक रुपमा स्वीकार्य नहुने बताएका थिए ।

‘हाम्रा बटुकहरु हरेक दिन धार्मिक कार्यक्रममा सहभागी हुनुपर्ने भएकोले दलित विद्यार्थीको संलग्नता व्यवहारिक रुपमा समाजले स्वीकार्देन’, चापागाईले भने ।

प्रधानमन्त्री कार्यालयमा ज्ञापन पत्र 

समाधानको प्रयास सफल नभएपछि तालाबन्दी गरेका उनीहरुले जिल्ला प्रशासन कार्यालय झापामा ज्ञापन पत्र बुझाएका थिए ।

प्रमुख जिल्ला अधिकारीमार्फत प्रधानमन्त्री कार्यालयलाई गुरुकुलभित्र हुने विभेद्लाई अन्त्य गर्नुपर्ने माग गर्दै ज्ञापन पत्र बुझाइएको हो । प्रमुख जिल्ला अधिकारी जनकराज दाहालले समाजमा कुनै पनि विभेद्को घटना हुन नहुने बताएका छन् ।

ज्ञापन पत्र बुझ्दै उनले माग सम्बोधन गर्न सहजीकरण गर्ने प्रतिवद्धता व्यक्त गरेको उत्पीडित अधिकार मञ्च नेपालका सचिव सागर पोर्तेलले जानकारी दिए । अधिकारकर्मीले स्थानीय सरकार भद्रपुर नगरपालिका प्रमुख जीवन कुमार श्रेष्ठलाई पनि ज्ञापन पत्र बुझाएका थिए ।

देशभरका गुरुकुल, विधापिठमा, सबै जाति,लिङ्गका विधार्थी अध्ययन गर्न पाउनुपर्ने, गुरुकुल आश्रम सञ्चालन पक्षले अमानवीय व्यवहार गरेकोले जातीय छुवाछूत तथा भेदभाव ( कसुर र सजाय) ऐन २०६८ बमोजिम हदैसम्म कारबाही गरिनुपर्ने, दलित भएकै कारण भर्ना लिन अस्वीकार गरेको विद्यार्थीलाई ४८ घण्टाभित्र भर्ना भर्ना गर्नुपर्ने, कुरिती र कुसंस्कारको संरक्षण गर्ने पाठशाला खारेजी गर्नुपर्ने ज्ञापनमा उल्लेख गरिएको छ ।

२०७५ जेठ ३ गते ११:४२ मा प्रकाशित

सम्बन्धित शीर्षकहरु

अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

मुख्य खबरहरु

२ प्रतिकृयाहरू प्राप्त
  • Ryam लेख्नुहुन्छ    |   २०७५ जेठ ३ गते १८:५३

    त्यसैले यो कु संसार मानेर बस्नुभन्दा ख्रिष्टीयान धर्म नै ठिक हो । ख्रिष्टीयान धर्ममा परमेश्वरले सबैलार्इ एउटै सन्तान हुने अधिकार दिनुभएको छ ।

    1
    0
    Share

  • हरि चन्द्र लावती लेख्नुहुन्छ    |   २०७५ जेठ ४ गते ७:४९

    असमान व्यवहार गरेपछि विद्यालय भएर के गर्नु ? अाफुलाइ मात्र ठूलाे सक्षम ठीक माने पछि मानिसले पढेर के गर्नु ? मानवता र समानताकाे सिकाइ बिनाकाे मानिस, प्रशासक, समाजसेबी हाम्राे देशमा कहिले जन्मेलान् ?

    0
    0
    Share

यसमा तपाइको मत




फेसबुकबाट तपाईको प्रतिक्रिया

Also you may like this