१० असार, सप्तरी । आफ्नै गृहजिल्लामा जहाजबाट ओर्लिन पाउँदा सप्तरीको कञ्चनरुप नगरपालिका २ बरमझिया निवासी कृष्णलाल पण्डित निकै खुसी देखिए । मुस्कुराउँदै जहाजबाट ओर्लिएका ५५ बर्षीय पण्डितले भने, आफ्नो ठाउँमा जहाजबाट आउँदा एकदमै खुशी छु ।’
उनी काठमाडौंमा काम गर्ने छोरालाई भेट्न बसमा गएका थिए । रात्रीबसमा काठमाडौं गएका उनी रातभरी सुत्न पाएका थिएनन् । तर, छोराले जहाज चढाइदिएपछि केहीबेरमा राजविराज आइपुगेका छन् ।
राजविराज ६ की फुलियादेवी यादव पनि धेरै खुशी देखिइन् जहाजबाट ओर्लिदा । छोरा सचिदानन्दसँगै काठमााडौंबाट जहाजमा राजविराज आएकी ७० बर्षीया उनले भनिन्, ‘बस या माइक्रोमा जाँदा धेरै उल्टी हुन्थ्यो । तर केहिबेरमै राजविराज आएपछि त्यस्तो केहि समस्या झेल्नुपरेन् ।’
श्री एयरलायन्सको ५० सिटे जहाजले आइतबारदेखि राजविराज विमानस्थलमा नियमित उडान सुरु गरेको छ ।
शनिबार र मंगलबारबाहेक सातामा ५ दिन नियमित एउटा उडान गर्ने तालिका श्री एयरले बनाएको छ ।
२०१६ सालमा निर्माण भएको राजविराज विमानस्थलका रन वे काम हालै सम्पन्न भएर उद्घाटन गरिएको थियो । उडानको पहिलो दिन काठमाडौंबाट ४६ जना यात्रु राजविराज आएका छन् । राजविराजबाट २२ जना यात्रु काठमाडौं गएको श्री एयरलायन्सले जनाएको छ ।
जहाज राजविराजबाटै उड्न थालेपछि आफ्नो ठाउँ र काठमाडौं ओहोरदोहोर गर्नेहरुका लागि सजिलो भएको छ । राजपाका महासचिव केशव झा पनि पहिलो उडानबाटै काठमाडौं लागेका छन् । उनले यही ठाउँबाट जहाज उड्न थालेपछि असाध्यै खुशी लागेको बताए ।
राजविराजबाट जहाज उडन शुरु भएपछि सप्तरी, सिरहा, उदयपुर, सुनसरीको पश्चिमी क्षेत्रका जनतालाई काठमाडौं जान सहज भएको छ । यसअघि विराटनगर या जनकपुर जानुपर्ने विवशता रहेको थियो ।
पहिलो यात्रु र कर्मचारीलाई सम्मान
श्री एयरलायन्सले पहिलो उडान गरेको दिन विमानस्थलमा राजनीतिक दलका नेतादेखि उद्योगी व्यापारी उपस्थित भए । छेउछाउका बासिन्दाहरुको उल्लेख्य रुपमा भीड लाग्यो ।
दिउँसो १ः१५ बजे काठमाडौंबाट उडेर २ः१० बजे यहाँबाट उड्ने तालिका एयरलायन्सले बनाए पनि आइतबार प्रधानमन्त्रीको टोली चीनबाट आएका कारण जहाज ढिलो विमानस्थलमा आएको थियो । यसबीचमा चर्काे घामकाबीच जहाज हेर्न र यात्रु तथा जहाजका कर्मचारीलाई स्वागत गर्न राजविराजका मेयर, उप मेयर, उद्योगी, व्यवसायी उभिरहेका थिए ।
पहिहलो पटक जहाज लिएर आउने जहाजका पाइलट, एयर होस्टेससहितका कर्मचारी र काठमाडौंबाट आउने र जाने सम्पूर्ण यात्रुलाई स्वागत गरिएको छ । राजविराज नगरपालिकाका मेयर शम्भु यादव, उपमेयर साधना झाले गम्छा तथा फूलको माला लगाइदिएर उनीहरुको सम्मान गरे ।
जहाज उड्न थालेपछि सप्तरी जिल्लाको विकासमा एक इँटा थपिएको बताउँदै सप्तरी उद्योग बाणिज्य संघका अध्यक्ष अरुण प्रधानले भने, यसबाट जिल्लामा थप चहलपहल बढ्नेमा आशावादी छु ।’