Advertisement skip this
  1. ताजा अपडेट
Comments Add Comment

फिल्ममा लगानी ‘लंगुरबुर्जा’ जस्तै, यसरी ‘मुर्गा’ बन्छन् निर्माता

कोहीलाई साथीले डुबाए, कोही लोभले डुबे

निर्देशक सुरज सुब्बा ‘नाल्बो’ ले चलचित्र ‘माई प्रमिस’ निर्देशन गरे । लाहुरेको कथा भएकाले चलचित्रको छायांकन सिंगापुरमा लगेर पनि गरियो । जम्बो टोलीका लागि निर्माताले राम्रै खर्च गरे ।

तर, चलचित्र रिलिज हुन धेरै बर्ष लाग्यो । बल्लतल्ल चलचित्र हलमा त लाग्यो, तर दर्शक हेर्न आएनन् । रिलिजको समयमा निर्माताले टाउकोमा हात राखेर बस्नु बाहेक अरु विकल्प भएन । विचरा ती निर्माता त्यसपछि चलचित्र क्षेत्रमा फर्कन सकेका छैनन् ।
०००

केही समयअघि निर्देशक राजु गिरीले ‘देश परदेश’ चलचित्रको घोषणा गरेर छायांकन पनि सुरु गरे । प्रेम सोनी यो चलचित्रका निर्माता तथा हिरो थिए । प्रेमलाई हिरो भन्ने भूत सवार थियो, राजु गिरीलाई चलचित्र निर्देशन गर्ने लहड । दुबैको कुरा मिल्यो र काम सुरु गरे ।

गतिलो छवि नभएका राजु गिरी निर्देशक भएकै कारणले थुप्रै नायिकाले चलचित्र खेल्न मानेनन् । बल्लबल्ल सारिका केसी चलचित्र खेल्न राजी भइन् । अहिले यो चलचित्रको अत्तोपत्तो छैन । प्रेमको हिरो बन्ने चाहना त पुरा भएन नै, उनको ठूलै रकम डुब्यो ।
०००

चलचित्र ‘रानी महल’ को ३० प्रतिशत छायांकनपश्चात लफडा उत्पन्न भएपछि अहिले यसको काम रोकिएको छ । चलचित्रलाई वेदप्रसाद भुषालले निर्माण गरिरहेका थिए ।

अर्कै व्यवसायमा सक्रिय भुषाललाई उनका पुराना साथी हिमाल न्यौपानेले चलचित्र निर्माणका लागि आग्रह गरे । न्यौपानेले बेदप्रसालाई भने- ‘फिल्ममा करिअर सुरुवात गर्दैछु, तिमीले लगानी गरेर सहयोग गरिदेउ ।’

बेदप्रसादलाई चलचित्र क्षेत्र खासै रुचीकर थिएन । तर, साथी हिमालले बलिउड स्तरको चलचित्र बनाउने भन्दै उनलाई फकाए । बेदप्रसाद भन्छन्-‘साथी हिमालले आफ्नो काम देखाउन पनि सुरुमा कसैले पत्याउनै पर्ने भन्दै मलाई अफर गरे । उनले चलचित्रले लगानी सुरक्षित गर्ने आश्वासन दिएर डेढ करोडसम्म लगानी गर्न आग्रह गरे । मैले साथीको करिअरमा पनि सहयोग पुग्ने र आफ्नो लगानी पनि सुरक्षित हुने ठानेर पैसा हालेँ ।’

तर, ३० प्रतिशत छायांकन नसकिदै चलचित्रको बजेट २ करोड पुगेको छ । छायांकनस्थल पाल्पामा पुग्दा वेदप्रसादले चलचित्र क्षेत्रमा छाडातन्त्र फैलिएको र दुषित भएको बल्ल बुझे । उनले प्राविधिकहरुलाई भनेर दिएको पैसा प्रोडक्शन डिजाइनर गणेश सापकोटाले आफ्नै खल्तिमा राखे । पैसा नपाएको भन्दै प्राविधिहरुले विद्रोह गरेपछि बल्ल सपनाबाट व्यूझिएझैं भए वेदप्रसाद ।

अनलाइनखबरसँग उनले भने-‘यो बिषयमा यति धेरै हल्ला नभएको भए म चलचित्रबाट ब्याक पनि हुन सक्थेँ । तर, अब चलचित्र पुरा गर्छु ।’
८५ लाखमा सक्ने लक्ष्यका साथ सुरु भएको कुरा प्रोजेक्ट अब साढे ३ करोडमाथि लाग्ने पक्का छ । यत्रो लगानी कसरी सुरक्षित गर्ने भन्नेमा अञ्जान छन् बेदप्रसाद ।

‘बलिउड स्तरको चलचित्र बनाउँछु र लगानी सुरक्षित हुन्छ भनेर निर्देशक ज्यूले भन्नुभएको थियो । अरु मलाई खासै थाहा छैन,’ उनी भन्छन् ।

०००
भदौ १ गतेबाट रिलिज हुन लागेको चलचित्र ‘जय शम्भु’का निर्माता दिनेश शाहीको व्यथा पनि उस्तै छ । दिनेशलाई चलचित्र क्षेत्रमा आउने सोच त थियो । तर, कस्तो चलचित्र बनाएको खण्डमा कसरी, कतिसम्म लगानी उठाउन सकिन्छ भन्ने उनलाई अझै पनि थाहा छैन ।

उनले अनलाइनखबरसँग भने-‘आफूलाई पनि रहर थियो र साथीभाइले पनि चलचित्र बनाउँदा फाइदा हुन्छ भनेपछि लगानी गरेँ ।’
तर, सहकारी व्यवसाय गर्दै आएका दिनेशलाई चलचित्र निर्माणको केही ज्ञान थिएन । उनले आफूलाई ज्ञान नभएकाले नै निर्देशकले दिएको बजेटभन्दा अत्यधिक खर्च भइरहेको बताए ।

उनले भने-‘मलाई डेढ करोडमा उत्कृष्ट चलचित्र बनेर हलमा लाग्छ भनिएको थियो । तर, अहिले बनाउँदा बनाउँदै सवा २ करोड खर्च भइसक्यो ।’

दिनेशलाई यो रकम कसरी सुरक्षित हुन्छ भन्ने अत्तोपत्तो छैन । उनले भने-‘मलाई त्यसको आइडिया भएन । राम्रो चलचित्र बन्यो भने, इनिसियल व्यापार गर्‍यो भने लगानी उठ्छ भन्ने लागेको छ । अरु, केही पनि थाहा भएन ।’

उनी थप्छन्-‘चलचित्र क्षेत्रको बारेमा ज्ञान दिने साथी नै कोही भएनन् । मैले पनि खासै चलचित्र क्षेत्रमा मानिसहरु चिनेको छैन । गोपिकृण्ण हलमा गएर अरुको चलचित्र हेर्दा यस्तो बनिदियो हुन्थ्यो भन्ने लाग्थ्यो । तर, यहाँ त ‘ए, बी, सी’ ग्रेडका चलचित्र हुँदा रहेछन् ।’

तर, उनलाई अझै पनि चलचित्रको भोक मरेको छैन । उनले, अब आफूले चलचित्रको बारेमा सबै कुरा वुझेकाले अर्को चलचित्र मिहिनेत गरेर बनाउने बताए ।

००
चलचित्र ‘हिरोज्’ मा हिरोइन बन्न आएकी पूर्णिमा लामा परिवन्दले निर्माता भइन् र ८० लाख रुपैयाँ सकिन् । चलचित्र हलमा त लाग्यो, तर देशभरबाट २ लाख पनि उठेन होला । चलचित्रको कार्यक्रममा पूणिर्माले रुदै आफूलाई फसाइएको बताएकी थिइन् । तर, ५० हजार पारिश्रमिकमा चलचित्र खेल्न आएकी पूणिर्मा अन्त्यमा ८० लाख लगानी गर्ने निर्माता नै बनिन् ।

०००
नेपाली चलचित्र क्षेत्रमा नेपाली चलचित्रमा अहिले नयाँ निर्माताको बाढी नै छ । म्यानपावर व्यवसायी, जग्गा व्यवसायी, एनआरएनहरुले चलचित्रमा सर्वाधिक लगानी गरेका छन् ।

हरेक नयाँ चलचित्रमा ३ देखि ४ जना नयाँ निर्माताको नाम सुनिन्छ । तर, अधिकांश निर्माताको अवस्था, हामीले माथि उल्लेख गरेजस्तै छ । उनीहरुले न त चलचित्र क्षेत्र नै बुझेका छन्, न त चलचित्रमा लगानी गरेर कसरी सुरक्षित हुन सकिन्छ भन्ने नै वुझेका छन् । आँखा चिम्लिएर लगानी गर्ने यिनै निर्माता ‘मुर्गा’ नामले सम्बोधित छन् ।

चलचित्रमा लगानी गर्न आउने यी निर्माता केही त जानीजानी ‘मुर्गा’ बनेका छन् भने धेरैलाई ‘मुर्गा’ बनाइएको छ । सुरुमा कम बजेट भनेर चलचित्रको काम सुरु गर्ने र विस्तारै पुगेन भन्दा भन्दै निर्मातालाई घर न घाटको बनाइदिने प्रचलन बढेको छ ।

तिहारमा खेलाइने ‘लंगुरबुर्जा’ र निर्माताको लगानी उस्तै भएको छ । लंगुर बुर्जामा सय रुपैयाँ हार्दा फर्किन्छ कि भन्ने आशमा हजारौं डुबाउने धेरै हुन्छन् । चलचित्रमा पनि ५० लाख त लगानी भैहाल्यो, अब थोरै थपौ न भन्दा भन्दै करोडौ झ्वाम बनाउनेहरु धेरै छन् ।

चलचित्र निर्माता संघका अध्यक्ष आकाश अधिकारी नयाँ निर्मातालाई चलचित्रको पुरा जानकारी लिएर मात्र लगानी गर्न आग्रह गर्छन् । उनले भने-‘कसैले फकायो, आश्वासन दियो भनेर आँखा चिम्लिएर लगानी नगर्नुहोस् । पहिले कति लगानी गर्दा कसरी पैसा फिर्ता हुन्छ, बजारमा कलाकारको रेट कति छ वुझ्नुहोस् ।’

उनले, चलचित्रको बारेमा केही महिना अनुसन्धान नगरी चलचित्र नबनाउन नयाँ निर्मातालाई सुझाए । ‘छक्का पन्जा’, ‘सत्रु गते, कोहिनुर, लुट २’ जस्ता केही चलचित्रले ग्रसमा कमाएको रकम सुनेर पनि कतिपय निर्माताले लगानी गरेका छन् । निर्देशक दीपाश्री निरौला भन्छिन्-‘हाम्रो चलचित्रमा लगानी गर्छु भनेर धेरै एनआरएन साथीहरु आउनु भएको छ । तर, हामीले मिहिनेत गरेर ब्रान्ड बनाएको चलचित्रलाई हामी आफै लगानी गर्छौ भनेर बसेका छौ ।’

उनका अनुसार, निर्माताले पैसा कमाउँछ भन्ने त सुनेका छन् तर कसरी कमाउँछ भन्ने वुझेका छैनन् । जसले गर्दा, चलचित्रमा आँखा चिम्लिएर लगानी गर्ने र पछि यही क्षेत्रलाई गाली गर्दै हिड्ने निर्माताहरु धेरै छन् ।

अहिले चलचित्रको लगानी कुनै समयको नेटवर्क व्यवसाय जस्तो भएको छ । सुरुमा एक जनाले चलचित्र बनायो, डुबेपछि अर्को चलचित्रमा ४ जना खोज्यो । ४ जना फेरि बाँडिएर प्रत्येकले ४ जना खोज्यो र चलचित्र बनायो ।

चलचित्र क्षेत्रमा आउने धेरै निर्मातालाई साथीभाई, फेसबुकमा चिनेका अन्य निर्माता, निर्देशकले ‘मुर्गा’ बनाएका छन् । कतिपय भने जानी जानी हाम्फालेका छन् ।

सय निर्मातामा २ जनाले कमाए भन्दैमा सबैले कमाउँछन् भन्ने हुँदैन । ठूलो प्रतिफलको लोभ देखाएर सोझा निर्मातालाई चुर्लुम्ब डुबाइदिनु भनेको अपराध हो । हुँदै नहुने आश्वासन दिएर कसैको धन सम्पत्ती र भावनासँग खेल्ने काम बन्द हुनुपर्छ । अनि मात्र, चलचित्र क्षेत्र स्वच्छ र इज्जत गर्न लायकको बन्नेछ ।

कथा जेसुकै होस्, एउटा लोकगीत त चाहियो-चाहियो !

नौलो भूमिका पाएनौ भन्ने कलाकार आफैंले बनाएको फिल्ममा चिप्लिदै

कलाकारलाई प्रश्नः कपाल पाल्दैमा, जिम जाँदैमा क्यारेक्टरमा पसिन्छ र ?

हिरोलाई ५० लाख, अनि कथालाई ?

अनमोलदेखि साम्राज्ञीसम्मः कसको स्टार पावर कति ?

पेलाईमा निर्माता, ‘मुर्गा’ संस्कृति कहिलेसम्म ?

यो खबर पढेर तपाईलाई कस्तो महसुस भयो ?

0%

खुसी

0%

दुःखी

0%

अचम्मित

0%

उत्साहित

0%

आक्रोशित

ट्रेन्डिङ

Advertisment