२ साउन, काठमाडौं । नेविसंघको असन्तुष्ट पक्षले बुधबार १२ औं महाधिबेशन तयारीको लागि भन्दै कार्यालय स्थापना गरेको छ ।
बहुमत सदस्य आफ्नो पक्षमा रहेको दावीसहित यसअघि नै यही साउन २३ देखि २५ का लागि महाधिबेशन घोषणा गरेको समूहले शंकरदेव क्याम्पस अगाडि कार्यालय स्थापना गरेर काम सुरु गरेको हो ।
प्रकाश रानाको अध्यक्षतामा गठन भएको महाधिबेशन तयारी समितिले महामन्त्री कुन्दनराज काफ्ले उपाध्यक्ष रामप्रसाद अधिकारी, डिल्लीराम सुवेदी, नवीन राई लगायत नेताकार्यकर्ताको उपस्थितिमा कार्यालय स्थापना गरेको केन्द्रीय सदस्य सुशील भट्टले जानकारी दिए ।
१२९ जना सदस्यहरु मध्ये दुई तिहाई संख्याले महाधिबेशन घोषणा गरेर तयारी थालिएको अर्का केन्द्रीय सदस्य अनिलबहादुर शाहीले बताए ।
असन्तुष्ट पक्षले अध्यक्ष नैनसिंह महरले महाधिबेशन गर्न नचाहेको आरोप लगाउँदै महाधिबेशन नै घोषणा गरेका थिए । तर, अध्यक्ष समूहले पनि यही साउन ५ गते तयारीका लागि भन्दै केन्द्रीय समितिको बैठक बोलाएको छ ।
