Comments Add Comment

टिचिङ अस्पतालमा मृगौला प्रत्यारोपणको १० वर्ष पूरा

 

२३ साउन, काठमाडौं । दश वर्षको अवधिमा चिकित्साशास्त्र अध्ययन संस्थान शिक्षण अस्पताल  (टिचिङ अस्पताल) महाराजगञ्जले ५०६ जनामा सफलतापूर्वक मिर्गौला प्रत्यारोपण गरेको छ ।

सो अस्पतालले नेपालमा पहिलोपटक २००८ को अगष्ट ८ मा मिर्गौला प्रत्यारोपण गरेको थियो । प्रत्यारोपण कार्यको नेतृत्व डा दिव्यसिंह शाहले गरेकी थिइन् । उनलाई अष्ट्रेलियन प्रा. डा. डेभिड फ्रान्सिसले सहयोग गरेका थिए ।

प्रत्यारोपण भएकामध्ये ८५ प्रतिशत पुरुष र १५ प्रतिशत महिला छन् । यसैगरी १५ वर्षमुनिका बालबालिकाको सङ्ख्या आठ रहेको बुधबार यहाँ आयोजित कार्यक्रममा जानकारी दिइयो ।

हप्तामा दुईवटा प्रत्यारोपण कार्य शुरु गरेको अस्पतालले यसलाई निरन्तरता दिँदै आएको छ । प्रत्यारोपणका क्रममा १७ जनाको मृत्यु भएको छ । अस्पतालले आर्थिक अभावका कारण परीक्षण गर्ने प्रगोगशाला (एचएलए) स्थापना गर्न नसक्दा भारतमा पठाउनुपर्ने बाध्यता छ ।

प्रत्यारोपणको दशौँ वार्षिकोत्सवका अवसरमा अस्पतालद्वारा आयोजित कार्यक्रममा उपप्रधानमन्त्री एवं स्वास्थ्य तथा जनसंख्यामन्त्री उपेन्द्र यादवले अस्पताललाई प्रत्यारोपणका लागि आवश्यक पर्ने आर्थिक एवं उपकरण सहयोग गर्ने प्रतिवद्धता जनाए ।

सरकारी अस्पतालमा राज्यको ठूलो लगानी रहे पनि स्वास्थ्य सेवा प्रभावकारी हुन नसकेको बताउँदै उनले आधारभूत स्वास्थ्य सेवा पाउने जनताको मौलिक अधिकारलाई प्रत्याभूत गर्न सरकार प्रतिबद्ध रहेको बताए ।

मन्त्री यादवले भने, ‘जनताको घर आँगनमा आधारभूतसहित विशेषज्ञ स्वास्थ्य सेवा पुर्‍याउनु सरकारको पहिलो कर्तव्य हो, यस कार्यमा म जुटिरहेको छु, सहयोग गर्न आग्रह गर्छु ।’

सरकारी अस्पतालमा जडान भएका उपकरण चाँडै बिग्रने र त्यस्तै उपकरण निजीमा हतपत किन बिग्रिदैन  भन्ने प्रश्न गर्दै भने ‘ देश ग्रामीण भेगले बनेको छ, चिकित्सक शहरमा बस्दछन् अब समन्वय जरुरी छ’  मन्त्री यादवले भने ।

सो अवसरमा पहिलोपटक मिर्गौला प्रत्यारोपणमा महत्वपूर्ण योगदान पुर्‍याएका चिकित्सक तथा नर्सलाई सम्मान गरिएको छ । सम्मानित हुनेमा प्रा डा भोलाराज जोशी, प्रा. डा. महेश खकुरेल, प्रा. डा. कनकबहादुर रावत, प्रा. डा. गुणकुमार श्रेष्ठ, प्रा. डा. दिव्यासिंह शाह, प्रा. डा. प्रेमराज ज्ञवाली, प्रा. डा. उत्तमकुमार शर्मा, प्रा. डा. लोकराज मरहठ्ठा, प्रा. डा. डेभिड फ्रान्सिस र उपप्रशासक कृष्णदेव पन्त थिए ।

त्रिभुवन विश्वविद्यालयका उपकुलपति प्रा. तीर्थराज खनियाँले आगामी दिनमा चिकित्सा अध्ययन संस्थानको क्षमता बढाउन सहयोग थप्दै जाने बताए । मिर्गौला रोग विशेषज्ञ प्रा. डा. शाहले चिकित्सा शास्त्र अध्ययन संस्थानले मिर्गौला प्रत्यारोपण गरी नयाँ युगको शुरुवात गरेको भन्दै आगामी दिनमा यसको क्षमता बढाउन आवश्यक रहेको बताए । उनले भने ‘प्रत्यारोपणको दिनसम्म आइपुग्न विभिन्न कठिनाइ आइपर्‍यो, यसलाई सहजतापूर्वक समाधान गर्दै नयाँ इतिहास बनाउने काम गरियो ।’

सम्मानित प्रा. डा. फ्रान्सिसले पहिलो प्रत्यारोपण कार्य अन्तर्राष्ट्रिय मापदण्डभन्दा उच्च रहेको स्मरण गर्दै नेपाली चिकित्सकका ज्ञान, सीपको उच्च प्रशंसा गरे । अर्का मिर्गौला रोग विशेषज्ञ प्रा डा उत्तमकुमार शर्माले मिर्गौला प्रत्यारोपणका लागि छुट्टै केन्द्र स्थापना गर्न माग गरे ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment