कोरियोग्राफरबाट चलचित्र निर्देशक बनेकी रेनशा वान्तवा राइको निर्देशनमा तयार भएको चलचित्र ‘इन्टु मिन्टु लण्डनमा’को तेश्रो गीत ‘जुरायो’ सार्वजनिक भएको छ ।
यो गीतले विशेषगरि, बिबाहको माहोललाई देखाउन खोजेको छ । गीतको भिडियो मेकिङ उत्कृष्ट छ । गीतमा नायिका साम्राज्ञी राज्यलक्ष्मी शाह र नायक सारुक ताम्राकारलाई फिचरिङ गरिएको छ । चलचित्रमा नायक धिरज मगरको मुख्य भूमिका छ ।
यो गीतमा बसन्त सापकोटाको शब्द तथा संगीत, राजेश पायल राई र मेलिना राइको स्वर छ । विक्रम लामा र एन्जिला खत्रीले यो भिडियोको कोरियोग्राफी गरेका हुन् ।
असोज ५ गतेबाट रिलिज हुने यो चलचित्रले नेपाली चलचित्रलाई अर्को तहमा लैजाने दाबी निर्देशक राइको छ । उनले, मेकिङ र चलचित्रको कथामा विशेष ध्यान दिएको बताइन् । प्रभु शमशेर राणा र प्रज्वल शमशेर जबराले यो चलचित्रको निर्माण गरेका हुन् । चलचित्रले उत्कृष्ट व्यापार गर्ने अड्कल हुन थालेको छ ।