३ असोज, बाँके । नेपालगञ्जबाट भारतको राजधानी नयाँ दिल्लीका लागि सोझै हवाई उडानको सम्भावना तत्काल देखिएको छैन् ।
बुद्ध एयरले नेपालगञ्ज–नयाँ दिल्लीका लागि नियमित उडान सञ्चालन गर्ने घोषणा गरे पनि त्यसको सम्भावना अहिले देखिएको छैन । ‘अन्तर्राष्ट्रिय उडानका लागि डोमेस्टिक एयरको छुट्टै सेक्टर आवश्यक पर्छ, तर नेपालगञ्ज विमानस्थलमा त्यो छैन, यस सम्बन्धी पूर्वाधार निर्माण गर्न अझै एक वर्ष लाग्छ’ नेपालगञ्ज नागरिक उड्डयन कार्यालयका निर्देशक प्रेमनाथ ठाकुरले भने, ‘त्यसैले नेपालगन्ज–दिल्ली उडान अहिले सम्भव छैन ।’
बुद्ध एयरले पुस पहिलो सातादेखि नेपालगञ्ज–दिल्ली उडान भर्ने बताइरहेका बेला निर्देशक ठाकुरले कम्तीमा अझै पनि एक वर्ष यो विमानस्थलबाट कुनै पनि अन्तर्राष्ट्रिय उडान हुन नसक्ने जानकारी दिP । केही समयअघि बुद्ध एयरका प्रबन्ध निर्देशक वीरेन्द्रबहादुर बस्नेतले छ महिनाभित्र नेपालगञ्जदेखि दिल्ली सिधा उडान भर्ने घोषणा गरेका थिए ।
निर्देशक ठाकुरले भने, ‘कुनै पनि जहाज उड्नुभन्दा पहिले सम्बन्धित एयरपोर्टमा स्लट (जहाज ओर्लिने समय) माग गर्नुपर्छ, दिल्ली एयरपोर्टले रातीको समयमा त्यो समय उपलब्ध हुने बताएको छ तर, नेपालगञ्जबाट राति जहाज उड्ने सम्भावना अहिले छैन ।’
अन्तर्राष्ट्रिय मान्यताअनुसार अन्तर्राष्ट्रिय उडान हुने विमानस्थलमा डोमेस्टिक एयरका लागि छुट्टै व्यवस्थापन गर्नुपर्ने र त्यो तयार गर्न एक वर्ष लाग्ने पनि उनले बताए । ‘प्रिफ्याब बनाउनै एक वर्ष लाग्छ, कसरी सम्भव हुन्छ ? निर्देशक ठाकुरले भने, ‘उडान अनुमति दिनुभन्दा पहिले भारतीय एयरपोर्ट सुरक्षा युनिटले यहाँको विमानस्थलको सुरक्षाका बारेमा अध्ययन गर्छ, त्यो पनि भइसकेको छैन, सबै संरचना तयार भएपछि मात्रै उडान सम्भव हुन्छ ।’
विमानस्थलमा अहिले दुई वटा टर्मिनल बनाउने तयारी भइरहेको छ । त्यसको डिजाइन र लागत तयार भइरहेको छ । अबको दुई महिनामा टेण्डर आह्वान गरी निर्माण प्रक्रिया शुरु हुने निर्देशक ठाकुरले जानकारी दिए ।
मानसरोवर तीर्थ यात्राका नेपालगञ्ज ट्रान्जिट प्वाइन्टका रुपमा विकास भएपछि भारतीय यात्रुलाई मध्यनजर गर्दै बुद्ध एयरले नेपालगञ्ज–दिल्लीको उडानलाई प्राथमिकतामा राखेर पहल गर्दै आएको छ । यो रुटमा दैनिक उडान गर्ने योजना बुद्ध एयरको छ ।
