६ असोज, सिन्धुपाल्चोक । जिल्ला समन्वय समितिले सुनकोशी, इन्द्रावती लगायतका नदी क्षेत्रबाट उत्खनन खुला गरेसँगै बगर कब्जा गर्ने होडबाजी नै चलेको छ । असारदेखि रोक लगाइएको नदीजन्य पदार्थ उत्खननलाई स्थानीय सरकार र प्रशासनले खुला गरेसँगै स्थानीयबासीबीच नदी छेउको बगर कब्जा गर्न होड चलेको हो ।
वर्षायामको तीन महिना सुनकोशी, इन्द्रावती नदी आसपासबाट नदीजन्य पदार्थ निकाल्न रोक लगाइएको थियो । स्थानीय सरकारले असोज ५ गतेबाट उत्खनन् खुला गरेपछि स्थानीयबासीहरु हातमा साबेल बोकेर नदी किनारहरुमा पुगेका छन् ।
कतिपय ठाउँमा झडप समेत भएको छ । सुनकोशी नदीको सुकुटे नजिकै चालिसे बगरमा कसले कुन स्थानमा बालुवा उत्खनन् गर्ने भन्ने विवाद हुँदा चौतारा साँगाचोकगढीको १०, ११ र १२ वडाका स्थानीयबीच झडप भएको थियो । झडपमा दुई जना घाइते भएको बन्देउ प्रहरीले जानकारी दिएको छ ।
१० नम्बर वडाको चालिसे बगरमा ११ र १२ वडाका स्थानीय पनि बालुवा निकाल्न आएपछि झडप भएको प्रहरीले जानकारी दियो ।
‘१० नम्बर वडाको आफ्नै त्यत्रो बगर छ, हामीले ४० वर्षदेखि यो वगरबाट बालुवा निकालेर जिविका चलाउँदै आएका छौं’, ११ नम्बर वडाका मुन्दे माझीले भने, ‘हामी १० को बगरमा पनि जाँदैनौ र ११ मा आए हामी कसैलाई पनि निकाल्न दिँदैनौं ।’
दुई वडाका बीचमा मात्रै होइन, एउटै वडामा पनि कसले कति बगर ओगट्ने भन्ने विवाद हुने गरेको छ । ३ गते रातिदेखि नै सुनकोशी नदीको छेउमा रहेको चालिसे बगरमा आएर सयौं स्थानीयलेे बगर कब्जा गरेका थिए ।
‘हामीले आफ्नो भनेर घेरा लगाएका थियौं । भोलिपल्ट आउँदा अरुले नै बालुवा निकाल्न लागेपछि भनाभन भएको हो’, १० नम्बर वडाकी मैना नेपालीले बताइन् ।
अन्यत्रबाट पनि सुनकोशी र इन्द्रावती नदी किनारमा आएर नदीजन्य पदार्थ निकालिरहेका छन् । स्थानीयले विरोध गर्दा बगर सबैको साझा भएको तर्क गर्ने गरेका छन् ।
जिल्ला समन्वय समितिका प्रमुुख कृृष्णगोपाल तामाङले भने सामाजिक संरचना र निजी आवास निर्माणमा सहजता ल्याउन उत्खनन् खुला गरिएको बताएका छन् ।
