Comments Add Comment

निगमले अब अप्ठेरो अवस्थामा सेनाका चालकको सहयोग लिने

६ असोज, काठमाडौं । ४ दिनदेखि रोकिएको तेलका ट्यांकर काठमाडौंमा आईपुग्न थालेका छन् । ट्यांकर चालकहरु आन्दोलनमा उत्रिएपछि शुक्रबार सरकारले सेनाका चाकलहरुलाई नै भारतीय डिपोमा ट्यांकर लिन पठाएको थियो ।

शुक्रबार साँझ सहमति भए पनि त्यसअघि नै सरकारले सेनाका चालकलाई ट्यांकर लिन पठाएको थियो । निगमका निमित्त कार्यकारी निर्देशक सुशील भट्टराईका अनुसार सेना पठाएपछि ट्यांकर चालकहरूले अाफैं ट्यांकर चलाउन तयार भएका थिए । उनले यसपटकको अान्दोलनबाट पाठ सिक्दै अब निगमले २ सय अाफ्नै ट्यांकर राख्ने पनि बताए, जसले अप्ठेराे अवस्थामा ढुवानी गर्नेछन् । अब सेनाले पनि थप ट्यांकर किन्ने भएकाले अवस्था सहज हुँदै जाने निगमले बताएको छ ।

‘आजबाट आपूर्ति सहज भइसकेको छ । भद्रकाली पेट्रोल पम्पमा आज बिहान मेरो कुरा भएको थियो । त्यहाँ आज लाइन छैन, सहज छ भन्नुभएको छ । राष्ट्रपतिको सवारीका कारण सुरक्षाकर्मीले पुल्चोकको साझा पेट्रोल पम्प केहीबेर बन्द गराए छन्, केहीबेरमा हामी त्यसलाई खोल्न लगाउँछौं, त्यहाँ पनि सहज नै हुन्छ,’ उनले भने,’अहिले सबै मुभमेन्ट भइसक्या छ । अब विस्तारै सहज हुन्छ । उपभोक्ताहरु आत्तिनुपर्ने अवस्था छैन ।´

इन्धन ढुवानी रोकिएको खबर सार्वजनिक भएपछि बिहीबार र शुक्रबार पेट्रोल पम्पहरुमा लामो लाइन लाग्यो । अभाव अझै पनि हटेको छैन । थोरै लिनेले पनि धेरै लिन थालेपछि असहज जस्तो स्थिति देखिएको निगमले जनाएको छ ।

‘तत्काललाई कोटा प्रणाली लागु गरौं न भनेर कोटा तोकिदियौं । अहिले धेरै भन्दा धेरैले पाउन् भन्ने उद्देश्यले हामीले त्यो गरेका हौं । आज कति आउँछ, कस्तो हुन्छ, अहिले केही भनेका छैनौं । तर हामीलाई इन्धन कटौति गर्नुपरेको छैन,’ उनले भने,’ अहिले सबै ठीक छ । तीन दिनको अवधिमा जति तेल बजारमा गयो, त्यसलाई पूर्ति गर्ने हिसाबले हामीले सबै मिलाइसकेका छौं । विरानटगर, नेपालगञ्ज, भैरहवा लगायतका क्षेत्रमा पनि आवश्यक व्यवस्था मिलाएका छौं ।’

चालकको पछिल्लो आन्दोलनका कारण तेल आपूर्तिमा सरकारको अवस्था कहाँ रहेछ भन्ने कुरा पनि थाहा पाएको भट्टटराईले बताए ।

‘विगतमा नाकाबन्दीले गर्दा पाठ सिक्यौं । कम्तिमा तीन महिनाको भण्डारण बनाउनु पर्दोरहेछ भन्ने थाहा पायौं,’ भट्टराईले भने,’ हामी कति कमजोर रहेछौं भने, कसैले खेल्न चाह्यो भने, हामीभित्रै खेल्दिएर हामी भित्रै फुट हाल्दिएर हामी-हामीबीचमै समस्या हुँदो रहेछ भन्ने पनि देखियो ।’

अब निगमले आफ्नै ट्यांकर, आफ्नै चालकहरु चाहिँदो रहेछ भन्ने ज्ञान पाएको भट्टराई बताउँछन् । ‘एक-डेढ महिनाअघि हाम्रो मन्त्री ज्यू, तत्कालीन कामु प्रधानसेनापति ज्यू, सचिव ज्यू लगायतसँग भेट हुँदा पनि मैले यो प्रस्ताव राखेको थिएँ । उहाँलाई कत्तिको याद छ, मैले त्यतिबेला मलाई एक सय जना सेनाका चालकहरु दिनुपर्‍यो, चाँडोभन्दा चाँडो दिनुस्, म तिनीहरुलाई ट्रेन्ड गराउँछु भनेको थिएँ । यो कुरालाई सकारात्मकरुपमा लिनुभयो,’ उनले भने,’ हिँजो हामीले त्यही गर्नुपर्यो । अमलेखगञ्जमा नेपाली सेनाका ३० जनालाई एयर ड्रप गरेर हामीले झार्‍यौं । त्यसपछि हंगामा मच्चिएपछि दिउँसोदेखि नै आन्दोलन गर्नेहरुको मनोबल खस्कियो ।’

यदि सहमति हुन्थेन भने पनि आफूहरुले अर्को कोर्स लिइसकेको बताउँदै नचलाउने भए चाबी खोसेर अरुलाई चलाउन दिने भनेर डेढ सय जना चालकहरु तयार पारिसकेको दावी उनले गरे ।

‘डेढसय जनामध्ये ६० जनालाई फिल्डमा उतारिसकेका थियौं । तिनीहरु अहिले पनि फिल्डमा छन् । नेपाली सेनाका चालकहरुलाई दीर्घकालीनरुपमा नै तयार पार्छु भनेर मैले सोच बनाएको छु र, तिनीहरुको नामावलीसहितको डिटेल पनि मगाएको छु,’ भट्टराई भन्छन्,’ उनीहरुलाई एक हप्ता जस्तो तालिम दिइन्छ र खटाइन्छ । अमलेखगञ्जमा खटिएकाले त अब छाड्दैनन्, त्यहीँ बस्छन् र ढुवानीमा भूमिका खेल्छन् ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment