१० असोज, काठमाडौं । म्यानचेस्टर सिटी अक्फोर्ड युनाइटेडलाई पराजित गर्दै काराबाओ कप (इएफएल) फुटबलको चौथो चरणमा प्रवेश गरेको छ ।
मंगलबार राति तेस्रो चरणको खेलमा अक्फोर्डलाई सिटीले ३-० गोलको सहज जित निकाल्दै चौथो चरणमा पुगेको हो । सिटीलाई जित दिलाउन ग्राबियल जिसस, रियाद महरेज र फिल फोडेनले गोल गरे ।
पहिलो हाफको ३६ औं मिनेटमा जिससले गोल गर्दै सिटीलाई अग्रता दिलाएका थिए । पहिलो हाफमा १-० गोलले अघि रहेको सिटीले दोस्रो हाफमा थप २ गोल गर्न सफल भयो ।
खेलको ७८ औं मिनेटमा महरेजले गोल गर्दै सिटीलाई दोब्बर अग्रता दिलाएका थिए । खेलको ९० औं मिनेटमा फोडेनले गोल गर्दै सिटीलाई ३-० गोलको जित दिलाएका हुन् ।
