२० मंसिर, महोत्तरी । महोत्तरीमा दुई छुटाछुटै सवारीसाधन दुर्घटनामा दुईजनाको मृत्यु भएको छ । तीनजना घाइते भएका छन् ।
जलेश्वर नगरपालिका-३ मा भारतीय बसको ठक्करबाट गएराति एकजनाको मृत्यु भएको छ भने ३ जना घाइते भएका छन् ।
जनकपुरदेखि पटनासम्म चल्ने नेपाल भारत मैत्रीपूर्ण बसले बुधबार राति ठक्कर दिंदा एकजनाको मृत्यु भएको जिल्ला प्रहरी कार्यालय महोत्तरीले जनाएको छ ।
घाइते मध्ये एकको विराटनगर र दुईजनाको जनकपुर अञ्चल अस्पतालमा उपचार भैरहको छ ।
जनकपुरबाट पटना जाने क्रममा बीआर०६पीभी ९२५१ नं. को मैत्रीपूर्ण बसले जलेश्वर नगरपालिका वडा नं. ३ मलिवारमा विपरीत दिशाबाट आउँदै गरेको ज१प १६५० नंं.को मोटरसाइकललाई ठक्कर दिंदा मोटरसाइकल चालक बारा जिल्लाको अमवा निवासी २५ वर्षीय राजकुमार साहको मृत्यु भएको हो ।
घाइते हुनेहरुमा भारत सितामढी जिल्लाको सुतिहारा निवासी १८ वर्षीय सोनुकुमार ठाकुर र सोही ठाउँ निवासी ३० वर्षीया चुनचुन देवी ठाकुरको उपचार जनकपुर अन्चल अस्पतालमा भैरहको छ भने सोही ठाउँ निवासी २० वर्षीय मेघनाथ ठाकुरलाई थप उपचारको लागि विराटनगर लगिएको प्रहरीले जनाएको छ ।
ठक्कर दिने बसका चालक फरार रहेको छ भने बसलाई प्रहरीले नियन्त्रणमा लिएको छ ।
त्यस्तै बर्दिवास नगरपालिका १ मा बुधबार बिहानै ट्रकको ठक्करबाट एक पैदल यात्रुको मृत्यु भएको छ ।
बर्दिवास नगरपालिका-१ बस्ने ६० वर्षीय जनक कार्कीको ट्रकको ठक्करबाट मृत्यु भएको इलाका प्रहरी कार्यालय बर्दिवासले जनाएको छ ।
बा५ख ४६४१ नम्बरको मिनि ट्रकले बिपी राजमार्गस्थित मर्निङ वाकमा हिँडेका पैदल यात्रुलाई बुधबार बिहानै ठक्कर दिएको थियोे ।
ठक्करबाट गम्भीर घाइते कार्कीलाई थप उपचारको लागि जनकपुर लैजादै गर्दा बाटोमै मृत्यु भएको इलाका प्रहरी कार्यालय बर्दिवासका डीएसपी नकुल पोखरेलले जानकारी दिए ।
ठक्कर दिने ट्रक र चालकलाई प्रहरीले पक्राउ गरेको छ भने घटना बारे थप अनुसन्धान भैरहेको डीएसपी पोखरेलले जानकारी दिए।