११ पुस, काठमाडौं । सरकारले निजामती कर्मचारी समायोजनका लागि देशभर १ लाख ३८ हजार १७८ दरबन्दी कायम गरेको छ । संघमा ४७ हजार ९२०, प्रदेशमा २२ हजार ७५५ र स्थानीय तहमा ६७ हजार ५०३ दरबन्दी कायम भएको हो ।
दरबन्दी निश्चित भएकाले बुधबार नै कर्मचारी समायोजन फारम भर्न आह्वानसहित सूचना जारी गरिएको छ । दिउँसो साढे २ बजे संघीय मामिला तथा सामान्य प्रशासन मन्त्री लालबाबु पण्डितले पत्रकार सम्मेलन आयोजना गरेर समायोजन प्रक्रिया सुरु भएको बताए । सबै मन्त्रालयका सचिव र सहसचिवहरुलाई समेत पत्रकार सम्मेलनमा बोलाइएको थियो ।
मन्त्री पण्डितका अनुसार समायोजन फारम अनलाइनमार्फत भर्न सकिन्छ र कुन कर्मचारीलाई कहाँ खटाइएको भन्ने जानकारी पनि अनलाइनमार्फत् नै हुनेछ ।
यो पनि पढ्नुहोस कर्मचारी समायोजनका लागि आजदेखि आवेदन खुलात्यसका लागि सामान्य प्रशासन मन्त्रालयले सफ्टवेर निर्माण गरेको छ । त्यहाँ कर्मचारीहरुले आफ्नो विवरण इन्ट्री गरेर आफू समायोजन हुन चाहेको तह रोज्न पाउने छन् । तर, समायोजनको आधार जेष्ठतालाई मानिएकाले जेष्ठ कर्मचारीले रोजेर बाँकी रहेका ठाउँमा मात्र अन्य कर्मचारीहरुको पदस्थापन हुनेछ ।
‘प्रत्येक राष्ट्रसेवक कर्मचारीले आफूले इच्छाएको विवरण सफ्टवेयरमा भर्नुपर्ने छ । उनीहरुको प्राथमिकताका आधारमा समायोजनको प्रक्रिया अगाडि बढाउँछौं,’ मन्त्री पण्डितले भने ।
सरकारले यसअघि कर्मचारी समायोजन अध्यादेश ल्याएको थियो । मंसिर २३ गते राजपत्रमा प्रकाशित अध्यादेशमा संघीय संसदका दुवै सदनमा बुधबारदेखि छलफल सुरु हुँदैछ । अध्यादेश जारी भएको ६ महिनाभित्र संसदले पारित गर्नुपर्ने हुन्छ ।
कतिपय कर्मचारीहरुले अध्यादेशमा आफूहरुको वृत्तिविकासमा बाधा पुग्ने खालका प्रावधान पनि रहेको भन्दै त्यसलाई सच्याउनुपर्ने माग गर्दै आएका छन् । स्थानीय तहका कर्मचारीहरुले त अध्यादेशको विरोधमा आन्दोलनसमेत गर्दै आएका छन् । तर, मन्त्री पण्डितले भने वृत्तिविकासमा बाधा पुग्ने खालको व्यवस्था नभएको अभिव्यक्ति दिँदै आएका छन् ।
