नायक आकाश श्रेष्ठले चलचित्र ‘विर विक्रम २’ छाडेपछि निर्देशक मिलन चाम्सले विज्ञप्ती नै निकालेर उनले छाड्नुको कारण खोल्दै नायक पल शाहलाई चलचित्रमा अनुवन्धित गरे । मिलन चाम्सले आकाशलाई चलचित्रको घोषणा कार्यक्रममा बाजा बजाएरै स्वागत गरेका थिए । तर, आकाशले चलचित्रमा काम गर्न मन गरेनन् । बजारमा जे जस्ता खबर सार्वजनिक भएपनि आकाश आफ्नो भूमिकालाई लिएर सन्तुष्ट थिएनन् । यसैले उनले चलचित्र छाडेका थिए ।
नायक आकाश श्रेष्ठले चलचित्र छाडेको केही समयपछि नायक अनमोल केसीले मिलनकै निर्देशनमा बन्न लागेको चलचित्र छाडे । ‘ब्याचलर बन्टी’ नाम दिएर अनमोलसँग काम गर्न लागेको मिलनको योजना असफल बन्यो । मिलनले यो चलचित्र त बनाउनेछन्, तर अनमोल नायक नहुने पक्का छ ।
आकाश श्रेष्ठपछि नायक अनमोल केसीसँग पनि उनको ट्यूनिङ मिलेन । नायक अनमोल केसीको बारेमा मिलनले विज्ञप्ती नै निकालेर कुनै कुरा त भनेका छैनन्, तर कहिकतै मिडियामा एउटा स्टारले कथा नै नपढी किन चलचित्र साइन गरे त भनेर प्रश्न उठाएका छन् ।
मिलनले अनमोल र आकाशसँग मात्र होइन, नायिका अशिष्मा नकर्मीसँग पनि काम गर्न सकेनन् । चलचित्र ‘ब्लाइन्ड रक्स’का लागि अशिष्माले वर्कशप समेत गरिसकेकी थिइन् । वर्कशप गरिसकेकी नायिका कसरी अन्तिम समयमा चलचित्रमा भइनन्, त्यो त खुलेको छैन । तर, पछि यो भूमिकामा नायिका बेनिशा हमालले काम गरिन् ।
मिलनले काम गर्ने पक्का भएर पनि अन्तिम समयमा नजुरेका ३ कलाकारको नाम ‘अ’ अक्षरबाट सुरु हुन्छ । यसैले कतै, मिलनका लागि ‘अ’ अक्षरबाट नाम सुरु भएका कलाकार नै नफाप्ने त होइनन् भन्ने पनि देखिएको छ ।
तर, मिलनले नायक अनुप विक्रम शाहीसँग भने केही चलचित्रमा काम गरे । तर, पछिल्लो समयमा उनी र अनुपको सम्बन्ध पनि सुमधुर नभएको वुझिएको छ ।