३ माघ, विराटनगर । उच्च अदालत, विराटनगरले करिब ३८ क्वीन्टल सुन तस्करी प्रकरणमा मुछिएका विवादास्पद एसएसपी श्यामबहादु खत्रीलाई थुनामै राख्ने आदेश दिएको छ ।
बिहीबार उच्च अदालतमा मुख्य न्यायाधीश डा. कुलरत्न भुर्तेल र न्यायाधीश जनक पाण्डेको इजलासले विवादास्पद एसएसपी श्यामबहादुर खत्री र नेपाल एयरलायन्सका कर्मचारी अमरमान डंगोललाई थुनामै राख्ने आदेश दिएको हो ।
विवादास्पद छविका खत्रीले त्रिभुवन विमानस्थलमा कार्यरत रहदा ड्राइभर बिष्णुबहादुर खडका र सहयोगी अमरबहादुर थापामगरलाई प्रयोग गरी चुणमणी उप्रेती गोरेको समूहले दुबईबाट भित्र्याएको सुन एयरपोर्टबाट कटाउने काम गरेका थिए । खत्रीले एयरपोर्टबाट सुन कटाएबापत प्रतिकिलो ५० हजार रुपैयाँ लिने गरेको प्रहरी अनुसन्धानबाट खुलेको थियो । डंगोलले भने एयरपोर्टमा भित्रिएको सुन पास गराउन सहयोग गरेको प्रहरी अभियोगमा खुलेको थियो ।
खत्री र डंगोललाई जिल्ला अदालत मोरङका न्यायधिस नारायणप्रसाद शर्माको इजलासले गत जेठ ८ गते पूर्पक्षका लागि थुनामा राख्ने आदेश दिएको थियो ।
यो पनि पढ्नुहोस एक किलो सुन पास गराउँदा ५० हजार लिन्थे एसएसपी श्याम खत्री !सुन तस्करी प्रकरणमा गृहमन्त्रालयले गठन गरेको छानबिन समितिले मोरङ प्रहरीमार्फत गत बैसाख १९ गते जिल्ला अदालत मोरङमा ‘आपराधिक समूह स्थापना र संचालन गरी सुन चोरी पैठारी र चोरी निकासीको अवैध कारोबार, अपहरण तथा शरीर बन्धक र कर्तब्य ज्यान’ मुद्धा दायर गरेको थियो ।
सो मुद्दामा १७ अर्ब १ करोड ८० लाख ७१ हजार ४ सय ७३ रुपैया बराबरको ३७ लाख ९९ हजार ५ सय ६३ ग्राम (करिब ३८ क्वीन्टल) अबैध रुपमा सुन आयात गरिएको दाबी गरिएको छ ।
यो पनि, ३३ किलो सुनकाण्डका अभियुक्तलाई छाड्ने ५ न्यायाधीश ‘कारबाही’मा