वाइडबडी खरिद अनियमितता छानबिन गर्न गठित आयोग पदाधिकारीले नियुक्तिपत्र नै नपाई म्याद सकिएकोदेखि अनियमिततामा मुछिएका उच्चपदस्थ अधिकारीले उन्मुक्ति पाएकासम्मका खबरलाई आजका पत्रिकाले प्राथमिकतामा राखेका छन् । त्यस्तै, वीरको इमरजेन्सी, धनुषाको किशोरी हत्यालगायत विषयलाई पनि आजका पत्रपत्रिकाहरुले स्थान दिएका छन् ।
नयाँ पत्रिका दैनिकले वाइडबडी जहाज खरिद अनियमितता छानबिनका नाममा सरकारले जनताको आँखामा छारो हालेको निष्कर्ष निकालेको छ । छानबिन आयोग गठन गरे पनि त्यसका पदाधिकारीले नियुक्तिपत्र नै नपाई ४५ दिने म्याद सकिएको नयाँ पत्रिकाको समाचारमा उल्लेख छ ।
वाइडबडी अनियमितता छानबिन गर्न मन्त्रिपरिषद्ले गत १९ पुसमा पाटन उच्च अदालतका पूर्वमुख्इन्यायाधीश गोविन्द पराजुलीको अध्यक्षतामा तीन सदस्यीय छानबिन आयोग गठन गरेको थियो । नयाँ पत्रिकाका अनुसार, आयोगको म्याद शनिबार समाप्त भए पनि यसका अध्यक्ष पराजुलीले अहिलेसम्म यसको औपचारिक जानकारी पाएका छैनन् ।
अध्यक्ष पराजुलीले नयाँ पत्रिकासँग भनेका छन्– आयोग गठन भयो र मलाई अध्यक्ष बनाइयो भन्ने जानकारी मिडियाबाट पाएँ । त्यत्तिकै भरमा काम कसरी गरुँ ?’
संविधान जारी भएयताको साढे ३ वर्षमा मुलुकमा दर्जनौं ठूला अनियमितता भए पनि संलग्न उच्च पदस्थहरुमाथि कारबाही नभएकोलाई कान्तिपुरले मुख्य समाचार बनाएको छ । अख्तियारका तत्कालीन प्रमुख आयुक्त लोकमानसिंह कार्कीदेखि गोपाल पराजुलीसम्मका उच्चपदस्थ अनेक अनियमिततामा फसे पनि सातखत माफी पाएको कान्तिपुर समाचारको सार छ ।
अन्नपूर्णले धनुषामा बलात्कारपछि जलाइएकी बालिकारे मुख्य समाचार लेखेको छ भने नागरिकले वीरको अव्यवस्थित इमरजेन्सी उपचार कक्षबारे चिरफार गरेको छ ।
हेर्नुहोस् आजका पत्रपत्रिकाका फ्रन्टपेज