७ फागुन, काठमाडौं । सरकारले डिजिटल प्रणालीमा गएका टेलिभिजन सेवा प्रदायकलाई अनिवार्य कास/एसएमएस प्रयोग गर्न निर्देशन दिएको छ ।
एनालग टेलिभिजन सेवामा रोक लगाएको सरकारले डिजिटल प्रणालीमा गएकालाई पनि कास/एसएमएस जडान गरी सिग्नल वितरण गर्न निर्देशन दिएको हो ।
डिजिटल प्रणालीमा रुपान्तरण भएका कतिपय केवल टेलिभिजन संस्थाहरुले डिजिटल प्रसारण प्रणालीको मुख्य आधार कन्डिस्नल एक्सेस सिस्टम/सब्सक्राइबर म्यानेजमेन्ट सिस्टम (कास/एसएमएस) जडान नगरेको पाइएपछि त्यसलाई अनिवार्य गर्न निर्देशन दिइएको सञ्चार तथा सूचना प्रविधि मन्त्रालयले जनाएको छ ।
कास/एसएमएस प्रयोग नगरी बाइपास गरेर टेलिभिजन सिग्नल वितरण गरिएको भेटिए कानुन बमोजिम कारवाही गर्ने मन्त्रालयले चेतावनी दिएको छ ।
‘कन्डिस्नल एक्सेस सिस्टम’ को छोटकरी रुप हो कास । यो सिस्टम इन्टरनेट र टेलिभिजन सेवामा अनाधिकृत उपभोगमा रोक लगाउन प्रयोग गरिन्छ ।
प्याकेजमा नकिनेका च्यानललाई हेर्न रोक लगाउने र मूल्य तिरेका च्यानल उपभोग गर्न छुट दिने यो सिस्टमको काम हो । यो सिस्टम नहुँदा महंगा च्यानल पनि यसै उपलब्ध हुन्छ ।
सब्सक्राइबर म्यानेजमेन्ट सिस्टमलाई छोटकरीमा एसएमएस भनिएको हो । टेलिभिजन सेवा प्रदायकले आफ्ना ग्राहकका जरुरी सूचना, भुक्तानी, भण्डारण र व्यवस्थापन गर्नलाई यो सिस्टम प्रयोग गर्छन् ।
तर, नेपालका कतिपय टेलिभिजन सेवा प्रदायकले एसएमएस सिस्टम नगरेको पाइएपछि सरकारले यसमा थप नियमन गर्ने जनाएको छ ।
