बेल्जियममा आयोजित एक विशेष साइकल कुदाउने प्रतियोगितामा एकजना महिला प्रतिस्पर्धीलाई बीचमै रोकियो केहीबेर । महिला र पुरुषको छुट्टाछुट्टै प्रतियोगिता रहेको भए पनि ती महिला प्रतिस्पर्धीले पुरुष प्रतिस्पर्धीलाई समेत उछिन्ने छाँट देखेपछि आयोजकले उनलाई बीचमै रोकेका हुन् ।
गत शनिवार ओमलूप हेट न्युजब्लाड नामको संस्थाले सो साइकल रेसको आयोजना गरेको थियो । उक्त रेसमा भाग लिएकी निकोल हेनस्लमनलाई ३५ किलोमिटर दूरी पार गरिसकेको अवस्थामा संस्थाका रेश मार्सलले बाटोमै रोके, जतिबेला उनी तीव्र गतिमा साइकल कुदाउँदै पुरुष प्रतिस्पर्धीहरुलाई भेट्टाउनै आँटेकी थिइन् ।
उक्त प्रतियोगितामा महिलाभन्दा पुरुषको दौड १० मिनेट अगाडि नै सुरु गरिएको थियो । तर १० मिनेट पछाडि साइकल दौडाउन सुरु गरेकी हेनस्लमन यति तीव्र गतिमा हुइँकिइन् कि पुरुष टोलीलाई भेट्टाउन थालिन् । त्यतिबेलासम्म उनको महिला टोली निकै पछाडि थियो ।
कूल १ सय २३ किलोमिटर दूरीको साइकल दौड थियो त्यो । झण्डै एक चौथाइ दूरी पार गरिसक्दा पुरुष प्रतिस्पर्धीहरुलाई भेट्टाएपछि उनलाई रोकिएको थियो । पुरुषहरु अलिक अगाडि बढेपछि मात्र साइकल कुदाउन भनियो उनलाई ।
केहीबेर रोकिँदासम्म पुरुष प्रतिस्पर्धीहरु अगाडि बढिसकेको थिए भने निकै पछाडि रहेका महिला प्रतिस्पर्धी पनि नजिकै आइपुगेका थिए । तब मात्र उनलाई साइकल अगाडि बढाउन अनुमति दिइयो ।
उनलाई नरोकिएको भए उनी आफ्ना महिला प्रतिस्पर्धीलाई निकै पछि पार्दै दौड पूरा गर्थिन् होला । तर बीचमा रोकिनु पर्नाको असर निकोलले भोग्नुपर्यो । उनले बीचमा रोकिएर पुनः साइकल दौड सुरु गर्दा पहिलेको गति कायम गर्न सकिन् । जसका कारण उनी निकै पछि परिन् र उनी प्रतियोगितामा ७४ औँ स्थानमा पर्नुपर्यो । पहिलो स्थान चन्ताल ब्ल्याक नामकी महिलाले प्राप्त गरिन् ।
उनले आफ्नो इन्स्टाग्राममा घटनाको विवरण दिएकी छिन् । आफूलाई रोक्नुको कारणबारे उनले मजाक गर्दै लेखकी छिन्, ‘सायद म र मेरा महिला साथीहरु निकै तेज थिए या भनौँ पुरुषहरु स्लो थिए ।’
