३० फागुन, काठमाडौं । प्रधानमन्त्री केपी शर्मा ओली र उपप्रधान तथा स्वास्थ्यमन्त्री उपेन्द्र यादव यादवको भागवण्ड मिलेपछि सात महिनापछि चिकित्सा विज्ञान राष्ट्रिय प्रतिष्ठान (न्याम्स)ले उपकुलपति पाउने भएको छ । स्वास्थ्य मन्त्रालय स्रोतकाअनुसार प्रा. डा. डीएन शाह न्याम्सको उपकुलपति हुने भएका छन् ।
संघीय समाजवादी फोरमको कोटामा साह न्याम्सको उपकुलपति हुने भएका हुन् ।
वीर अस्पतालको निर्देशकमा डा. केदार सेन्चुरी आउने भएका छन् । उनी सत्तारुढ नेकपाको कोटामा आएका हुन् ।
यस्तै न्याम्सको रेक्टरमा डा सुवोध अधिकारी र रजिष्टारमा डा दिलीप शर्मा नियुक्त हुने भएका छन् । शर्मा प्रधानमन्त्री ओलीका निजी चिकित्सक समेत हुन् ।
यस्तै न्याम्सको डीनमा डा पिउस दाहाल र राष्ट्रिय ट्रमा सेन्टरको निर्देशकमा डा. प्रमोद यादवको नाम तय भएको छ । दुबै फोरमको कोटामा परेका हुन् ।
डीएन शाह र केदार सेन्चुरी दुबै उपत्यका बाहिर भएकाले नियुक्तिको औपचारिक घोषणा हुन ढिलाई भएको हो । तर, पत्र तयार भइसकेको मन्त्रालय स्रोतले जनाएको छ ।
