चलचित्र विकास बोर्डका अध्यक्ष केशव भट्टराई संचार, सूचना तथा प्रविधी मन्त्री गोकुल प्रसाद बाँस्कोटाको कार्यकक्षमा जाँदा सधै गाली खाएर फर्किएका छन् । अध्यक्ष भट्टराई स्वयंमले यो कुरा बताएका हुन् । बालाजुमा रहेको २७ रोपनी जग्गा मध्ये अहिले ६.५५ रोपनी जग्गा मात्र बाँकी छ । बोर्ड अध्यक्षलाई मन्त्रीले हरेक पल्ट भेट्दा जग्गाको कुरा कहाँ पुग्यो भनेर गाली गरेका छन् । अध्यक्षले भने–‘अहिलेसम्म त मन्त्रीज्यूले मलाई गाली मात्र गर्नुभएको छ, मैले जग्गा खोजिन भने पिट्नु नै हुन्छ होला ।’
मन्त्री बाँस्कोटाले बालाजुको सरकारी जग्गा मनपरी गरेर खानेलाई पानी मुनी गएपनि नछाड्ने बताइसकेका छन् । यसैले पनि बोर्ड अध्यक्षलाई यो काम गर्नु नै पर्ने दबाब छ । उनले भने–‘हामीले जग्गाको बिषयमा खोजिरहेका छौ । धेरै कागज हात परिसकेका छन् ।’ यस्तै, बोर्ड अध्यक्ष भट्टराइले राष्ट्रिय चलचित्र पुरस्कारका लागि राष्ट्रपतिले समय नदिएको भन्ने कुराको पनि खण्डन गरेका छन् । तीन बर्षको राष्ट्रिय चलचित्र अवार्ड एकैचोटी असार २७ गते आयोजना हुँदैछ ।
बोर्ड अध्यक्षले भने–‘राष्ट्रपतिले समय नदिएकाले अवार्ड नभएको भन्ने आलोचना पनि भयो । तर, म समय माग्न जाँदा राष्ट्रपति ज्यूले मलाई यसअघि पनि समय माग्न आउनुभएको थियो । तर, अवार्ड नै भएन भनेर भन्नुभएको थियो ।’
भट्टराइले नेपाल सरकारको आयोजनामा ‘आइफा अवार्ड’ हुन लागेको कुरालाई पनि अस्विकार गरेका छन् । उनले, आफू पनि यसमा प्रत्यक्ष जोडिएकाले आइफा अवार्डका लागि सरकारले कुनै रकम दिने बिषयमा कुरा नै नभएको प्रष्ट पारेका थिए ।