२२ असार, काठमाडौं । आयोजक इजिप्ट अफ्रिका कप अफ नेसन्स फुटबलबाट बाहिरिएको छ ।
अइतबार बिहान भएको प्रि–क्वाटरफाइनल खेलमा इजिप्ट दक्षिण अफ्रिकासँग १–० गोल अन्तरले पराजित हुँदै अफ्रिका कप अफ नेसन्स फुटबलबाट बाहिरिएको हो । पहिलो हाफसम्म गोलरहित बराबरी खेलेको इजिप्टले दोस्रो हाफमा गोल खान पुग्यो ।
खेलको ८५औं मिनेटमा थेमबिनकोसी लोर्चले गोल गर्दै दक्षिण अफ्रिकालाई जित दिलाए । उनकै गोलमा दक्षिण अफ्रिका क्वाटरफाइनलमा प्रवेश गरेको छ ।
इजिप्टले खेल समयभरि गोल गर्ने राम्रो अवसर खेर फाल्यो । आफ्नै घरेलु मैदानमा भएको प्रतियोगितामा मोहम्मद सलाहले आफ्नो देशलाई प्रिक्वारटफाइनलभन्दा माथि लान सकेनन् ।
