नायिका नीता ढुंगानाले आफ्नै निर्माणमा चलचित्र ‘मःम हन्टिङ बनाउने चर्चा केही दिनयता चलिरहेको छ । तर, नीताले तत्काल यो चलचित्र नबनाउने भएकी छिन् । कलाकारको समय नमिल्दा यो चलचित्रको समय एक बर्ष पछि धकेलिएको छ । तर, यो कथामा उनले चलचित्र बनाउने भने बताइन् ।
तर, यो बिचमा नीताले नयाँ चलचित्र बनाउने तयारी गरेकी छिन् । नीताले यसपटक लभ स्टोरी चलचित्र बनाउने बताइन् । अनलाइनखबरसँग कुरा गर्दै उनले भनिन्–‘नीताले चलचित्र कहिले बनाउलिन् भनेर मलाई विवादमा पनि तान्ने कोशिश गरियो । तर, अब २–३ महिनापछि लभ स्टोरी चलचित्रको छायांकन सुरु हुनेछ । उनले चलचित्रका लागि निर्माता नपाएपनि आफूले कमाएको रकम नै चलचित्रमा लगाउने बताइन् ।’
उनले अगाडि भनिन्–‘मैले अरु केही नकमाएपनि यो क्षेत्रमा सम्बन्ध कमाएकी छु । अरुलाई २ करोड लाग्ने चलचित्र म १ करोडमा सक्न सक्छु ।’ नीताले चलचित्रको नाम नजुरेको बताइन् । लभ स्टोरी चलचित्रका लागि सुहाउने नाम सुझाव दिन उनले दर्शकलाई समेत आग्रह गरेकी छिन् । उनले अगाडि भनिन्–‘अरु निर्माता ल्याएर भोली नीताले डुबाएर बदनाम गरि भनेर मलाई सुन्नु छैन । चलचित्र हिट वा फ्लप जे भएपनि मै भोग्छु ।’ उनी अभिनित चलचित्र ‘साइनो’ साउनको २४ गतेबाट रिलिज हुँदैछ ।
