१६ साउन, काठमाडौं । अपहरणमा परेको नाटक गर्ने २ जनालाई प्रहरीले बिहीबार पक्राउ गरेको छ ।
पर्सा विन्दवासिनी गाउँपालिका-४ मधुवलका २३ वर्षीय उपनेस चौरसिया र २१ वर्षीय सनुप दासलाई पक्राउ गरिएको जिल्ला प्रहरी कार्यालय पर्साले जानकारी दिएको छ ।
उपनेसले मंगलबार भारतको रक्सौलस्थित श्याम इन्टरनेशनल होटलमा बसी सनुपलाई वीरगञ्ज पठाएर अपहरण भएको हल्ला फैलाएको प्रहरीले बताएको छ ।
उपनेससँग उनका गाउँकै साथीहरु उत्तम भन्ने निरंजन तिवारी र एजाजुल मियाँसमेत रक्सौल पुगेका थिए । उनीहरु होटेलको कोठा नम्बर ५ मा बसेका थिए । र, त्यहीबाट उपनेसले सनुपलाई बोलाएर अपहरणमा परेको नाटकको योजना बनाएको प्रहरीको जनाएको छ ।
अपहरणको नाटकबारे उनीहरुमाथि थप अनुसन्धान भइरहेको प्रहरीले बताएको छ ।
