६ भदौ, वीरगञ्ज । प्रहरीले वीरगञ्जबाट भारतीय नक्कली नोटसहित २ जनालाई नियन्त्रणमा लिएको छ ।
पर्साको बहुदरमाई नगरपालिका वडा नं २ बैरिया विर्ता बस्ने ३४ बर्षका दिलिपकुमार साह र वीरगञ्ज महानगरपालिका २ छपकैया बस्ने ४८ बर्षका जमिल अख्तर पक्राउ परेका हुन् । बिहीबार साँझ पक्राउ परेका उनीहरुलाई शुक्रबार दिउँसो पत्रकार सम्मेलन गरेर प्रहरीले सार्वजनिक गरेको छ ।
उनीहरुको साथबाट भारतीय रुपैयाँ २ हजार दरका ९५ थान नक्कली नोट बरामद भएको जिल्ला प्रहरी कार्यालय पर्साका प्रवक्ता डिएसपी अनन्तराम शर्माले जानकारी दिए ।
नेपालबाट भारततर्फ पैदल जाँदै गर्दा वीरगञ्ज महानगरपालिका १६ ईदगाहा चोकबाट उनीहरुलाई प्रहरीले नियन्त्रणमा लिएको थियो । दुवैजनालाई जिल्ला प्रहरी कार्यालय पर्सामा राखेर थप अनुसन्धान गरिरहेको प्रहरीले जनाएको छ ।
पत्रकार सम्मेलनमा प्रहरी उपरीक्षक सोमेन्द्रसिंह राठौरले जाली नोटको कारोबारमा गिरोह नै सक्रिय भएको हुन सक्ने आशंका गरिएको बताए । ‘अनुसन्धानकै क्रममा छौं, धेरै कुरा बोल्न मिल्दैन तर जाली नोटको कारोबारमा गिरोह नै संलग्न रहेको आशंका हामीले गरेका छौं’ उनले भने ‘यही अनुसार थप अनुसन्धान अघि बढाएका छौं ।’
