बलिउडका शहंशाह अर्थात अमिताभ बच्चनले हालै मात्र ‘कौन बनेगा करोडपति’ को सेटमा आफ्नो सम्पत्तिका बारेमा एक महत्वपूर्ण खुलासा गरेका छन् ।
सोनी टेलिभिजनबाट प्रसारण हुने गेम रियालिटी शो ‘कौन बनेगा करोपति-११’ मा गत शुक्रबार कर्मवीर स्पेशल इपिसोडमा भारतीय समाजसेवीका सिन्धुताई सपकाल हटसिटमा थिइन् । सिन्धुताई एक अनाथ आश्रमको सञ्चालिका हुन्, जसले अहिलेसम्म १२ सय बालबालिकाहरुलाई शरण दिइसकेकी छिन् । अमिताभले सिन्धुताईलाई एउटा जिज्ञासा राख्दै सोध्छन्-तपाईंको आश्रममा बालिकाहरु धेरै छन् कि बालक ? यो प्रश्नको जवाफ दिँदै ताईले जवाफ दिन्छिन्-‘बालिकाहरु नै बढी छन्, म पनि बालिकाहरुलाई लिनकै प्राथमिकता दिन्छु, किनभने उनीहरुको सुरक्षा बढी आवश्यक छ ।’
अमिताभले एउटी सानी बालिकाको बारेमा पनि ताईसंग जिज्ञासा राख्छन्, जसलाई केही व्यक्तिहरुले बाल आश्रममा छोडेर गएका थिए । त्यसको जवाफमा सिन्धताईकी छोरी ममता बोल्छिन् । उनी भन्छिन्-‘राति फोन गरेर कसैले छोरी जन्मिएकी छिन्, त्यहाँ तपाईंले राख्न सक्नुहुन्छ, होइन भने हामी अरु नै केही सोच्ने छौं भन्छ । फोन गर्ने व्यक्तिको कुरा सुनेपछि ताईले ती बालिकालाई राख्ने निर्णय गर्छिन् ।’ ममताका अनुसार जब ताईले ती बालिकालाई भेटिन्, उनको अवस्था निकै नाजुक थियो । उनलाई १० दिनसम्म आईसीयूमा राख्नुपरेको थियो । उक्त कुरा सुनेर महानायक अमिताभसमेत निकै भावुक भए ।
सबै कुरा सुनेपछि अमिताभले भावुक हुँदै आफ्नो धारणा राखे । उनको भनाइ थियो-‘मैले पहिला पनि भनेको थिएँ र आज पनि भन्दैछु, जब म मरेर जान्छु, मर्नुभन्दा अगाडि मसंग जे जति सम्पत्ति बाँकी रहन्छ, धेर-थोर जति नै सम्पत्ति बाँकी रहे पनि त्यो सम्पत्ति मेरा दुई सन्तान छन्, एक छोरा र एक छोरी, उनीहरुलाई आधा-आधा बाँडेर दिनेछु, दुबैले बराबरी पाउने छन्, चाहे जे जति होस् ।’
वर्तमान अवस्थामा अमिताभ बच्चनसंग करिव ४ सय ६० करोड भारतीय रुपैयाँ बराबरको सम्पत्ति छ । यो कुराको खुलासा अमिताभकी धर्मपत्नी जया बच्चनको निर्वाचन आयोगमा बुझाइएको पत्रबाट भएको हो ।
