२० भदौ, काठमाडौं । नेपालले एसीसी यू-१९ एसिया कप क्रिकेट प्रतियोगितामा आयोजक राष्ट्रय श्रीलंकालाई १६० रनको सामान्य चुनौती दिएको छ ।
टस जितेर ब्याटिङ गरेको नेपालले ४२ ओभरमा ९ विकेटको क्षतिमा १५९ रन बनाएपछि श्रीलंकाले सामान्य चुनौती पाएको हो ।
नेपालले ९ ओभरको समाप्तिमा दुई विकेटको क्षतिमा ४३ रन बनाउँदा पानी परेपछि खेल रोकिएको थियो । खेल रोकिनुअघि नेपालका दुई ब्याट्सम्यान सस्तैमा समेटिएका थिए । आशिफ शेख ७ रनमा आउट हुदा पवन सर्राफ चार रनमा आउट भएका थिए । वर्षाको कारण खेल ४२ ओभरमा छोट्याएपछि खेल पुनः सुरु भएको थियो ।
नेपालका लागि रित गौतमले ५४ रन बनाएर आउट भए । त्यस्तै, कप्तान रोहितले ४७ रन बनाए । रोहित र रितले नेपाली पारी उकास्ने कोशिस गरेका थिए । यी दुई खेलाडीले ९१ रनको साझेदारी गरे । तर रोहित आउट भएसँगै नेपाली पारी धरापमा पर्यो ।
रोहितपछि हरिबहादुर चौहान १२ रनमा रनआउट भए भने भीम शार्की पनि एक रनमा एल्बीडब्लु आउट भए । तर राशिद खान भने १५ रनमा अविजित रहे ।
श्रीलंकाका लागि दिलसान मदुशनका र नभोद दिनुश्रीले समान ३-३ विकेट लिए ।
