साहित्यकार झमक घिमिरेको सफल कृती ‘जीवन काँडा कि फूल’मा आधारित रहेर तयार भएको चलचित्र ‘जीवन काँडा कि फूल’ शुक्रबारदेखि रिलिज हुँदैछ । यो चलचित्रमा झमकको बहिनीको भूमिकामा नायिका सारिका घिमिरेले काम गरेकी छिन् । सारिका यो भूमिकाका लागि आफूले निकै नै मिहिनेत गरेको बताउँछिन् ।
उनी भन्छिन्–‘मैले एक दृश्यमा झमकलाई बोक्नुपर्ने थियो । यो दृश्यका लागि मैले २१ टेक खाएँ । झमकजीलाई बहिनीले बोक्ने शैलीमा बोक्नका लागि मैले खुबै मिहिनेत गर्नुपरेको थियो ।’ नेपालमा सफल कृतीमाथि चलचित्र बनेका छन् । तर, ती चलचित्रले कृतीलाई न्याय गर्न नसकेको आरोप समेत लाग्ने गरेको छ । सारिका यो बिषयमा निर्माणटिम सचेत रहेको सुनाउँछिन् । उनले भनिन्–‘हामी पुस्तक भन्दा बाहिर गएका छैनौ । पुस्तककै कुरालाई चलचित्रमा ढाल्नका लागि निर्माण टिमले लामो तयारी समेत गरेको थियो । चलचित्र हलबाट बाहिर निस्कदा दर्शकको आँखामा आँशु आउँछ, तर उहाँहरु निराश भने हुनुहुन्न ।’
सारिकाले चलचित्र हेरिसकेपछि दर्शकले आफूलाई पनि संझने बताइन् । भनिन्–‘केही ठाउँमा च्यारेटी हुँदा मलाई दर्शकले राम्रो प्रतिक्रिया दिनुभएको थियो । यसैले पनि हलबाट पनि राम्रो प्रतिक्रियाको अपेक्षा छ ।’ चलचित्रले जीवनलाई काँडा भनेर संझनु भन्दा फूल बनाउनतर्फ लाग्नुपर्ने सन्देश दिने उनको भनाई छ ।
