२० कात्तिक, काठमाडौं । ललितपुर महानगरपालिकाले सिटी नेटमाफर्त ललितपुरभित्र पर्ने सामुदायिक विद्यालयहरुमा अनलाइन पठनपाठनको व्यवस्था मिलाएको जनाएको छ ।
ललितपुर महानगरपालिकाले बुधबार आयोजना गरेको सिटी नेटको ३८ औं सम्मेलनबारे जानकारी दिँदै ललितपुर महानगरपालिकाका प्रमुख चिरीबाबु मर्हजनले विद्यालयहरुलाई प्रविधिमैत्री बनाउन अनलाइन मार्फत पठनपाठनको व्यवस्था मिलाएको बताए ।
सिटी नेटको सहयोगले प्राकृतिक प्रकोपहरुबाट हुने क्षतिबाट बच्न मद्धत पुग्ने भन्दै उनले ठूलो विपत्तीको बेला अरु कसैसगँ हात फैलाउन नपर्ने बताए ।
उनले ललितपुर भित्रको २९ वटै वडामा विपत कोषको व्यवस्थापन गरेकाले यसबाट प्रत्यक्ष फाइदा भइरहेको बताए ।
महानगर प्रमुख मर्हजनले सिटी नेटको सम्मेलनले भ्रमण बर्षको संघारमा संस्कृति संरक्षणमा टेवा पुग्ने र भ्रमण वर्ष २०२० मा पर्यटक भित्र्याउन समेत सहयोग पुग्ने बताए ।
नेपालमा जति अन्य देशमा सांस्कृतिक सम्पदाहरु नरहेको जिकिर गदै उनले यस्ता सम्पदाहरुलाई बचाउन खासै चासो नदिएको भन्दै चिन्ता समेत व्यक्त गरे ।
विदेशमा सम्पदाहरु संरक्षणका लागि उच्च प्राथमिकतामा राख्ने गरेको भएपनि नेपालमा सम्पदा बचाउन खासै चासो नदेखाएको उनले बताए ।
नेपालको हरेक ठाउँमा महत्वपूर्ण सम्पदा क्षेत्र रहेपनि यसलाई बचाउनका लागि उचित पहल हुन नसकेको भन्दै उनले यसको संरक्षणमा सबै जना एक जुट भएर लाग्नु पर्ने बताए ।
सिटी नेटसगँ १४ नगरपालिकाको सहकार्य
सिटी नेटले विभिन्न सञ्जालमार्फत एक अर्को देशको सांस्कृति महत्व बोकेका सम्पदाहरुलाई जोड्ने गरेको छ ।
सिटी नेटले ललितपुर महानगरबासीको जीवनस्तर उकास्न, आयआर्जन गर्नका लागि हातेमालो गरिरहेको छ ।
सिटी नेटमार्फत काठमाडौं उपत्यकाभित्र कसरी सवारी न्यूनीकरण गर्न सकिन्छ, विकसित शहरबाट धेरै कुरा सिक्न र एक आपसमा सहकार्य गर्न मर्मत पुग्ने सिटी नेटका संस्थापकले बताएका छन् ।
नेपालको सांस्कृतिक सम्पदाहरुलाई अझ नजिकबाट प्रविधिमार्फत जोड्नुको साथै सिटी नेटले विभन्न शहरहरुलाई जलवायु परिवर्तन, प्राकृतिक विपत्तिहरुसँग सामाना गर्न, विकासका पूर्वाधारहरु पुयाउन एउटा शहरले अर्को शहरलाई जोड्न सहयोग गरेको छ ।
ललितपुर महानगरपालिकाले सिटी नेटसगँ विगत २९ वर्षदेखि सहकार्य गरिरहेको छ ।
नेपालमा पहिलो पटक भइरहेको ३८ औं सिटी नेट सम्मेलनमा सहभागी हुन विभिन्न देशका नगरप्रमुहहरुलाई सांस्कृतिक महत्व बोकेका सम्पदाहरुमा पाटन ढोकादेखि पाटन दरबारसम्म २ घण्टा पैदल घुमाउने कार्यक्रम रहेको छ । त्यस्तै सांस्कृतिक बाजागाजासहित बुङमति घुमाउने योजना रहेको छ ।
सिटी नेटसगँ नेपालको १४ वटा नगरपालिका जोडिएका छन ।
