२२ कात्तिक, काठमाडौं । नेपाल भ्रमणमा आउने विदेशी पर्यटकमा भारतीयलाई चिनियाँले उछिनेका छन् । नेपाल पर्यटन बोर्डका अनुसार अक्टोवर महिनामा भारतीय पर्यटकको तुलनामा चिनियाँ पर्यटक बढी संख्यामा नेपाल भ्रमणमा आए ।
यसै महिना चीनका राष्ट्रपति सी जिनपिङ नेपाल भ्रमणमा आएका थिए । उनको दुई दिने भ्रमणको विश्वव्यापी प्रचार भएको थियो । सो भ्रमणले पनि चिनीया पर्यटकहरुलाई नेपाल आउन प्रेरित गरेको बुझाइ बोर्डको छ ।
तथ्यांक अनुसार अक्टोवर महिनामा मात्र १५ हजार ३७ जना चिनियाँ नागरिक नेपाल भ्रमणमा आए । यो संख्या अक्टोवर २०१८ को तुलनामा ११।५ प्रतिशत बढी हो । यस महिनामा भारतीय पर्यटक भने १२ हजार ७ सय ६ जना मात्र आए । तथापि भारतीय पर्यटक पनि अघिल्लो वर्षको अक्टोवरको तुलनामा मात्र ९।१ प्रतिशतले बढेका हुन् ।
अहिले संसारभर चिनियाँ पर्यटकको चहलपहल बाक्लो छ । तर, नेपालमा कूल पर्यटक आगमनमा भारतीय नै अगाडी छन् । १० महिना -जनवरी-अक्टोवर० को अवधिमा कूल भारतीय पर्यटक १ लाख ६९ हजार ९ सय ५२ जना आउँदा चिनियाँ भने १ लाख ३४ हजार २ सय ८१ जना आएका छन् ।
अक्टोवर महिनामा कूल पर्यटक १ लाख ४३ हजार ८ सय ७० जना आए । अघिल्लो वर्ष यसै महिनामा १ लाख ३० हजार ७ सय ४ जना पर्यटक नेपाल आएको तथ्यांक रहेको छ ।
भ्रमण वर्ष प्रारम्भ हुनु दुई महिना अगाडिसम्मको कूल पर्यटक आगमन उत्साहजनक छैन । जनवरीदेखि अक्टोवर २०१९ सम्मको एकीकृत तथ्यांकअनुसार प्रतिमहिना औसत १ लाख पर्यटकसमेत भित्रन सकेका छैनन् । अध्यागमन विभागको तथ्यांकलाई उद्धृत गर्दै नेपाल पर्यटन बोर्डले दिएको जानकारी अनुसार १० महिनामा कूल ९ लाख ७५ हजार ५ सय ५७ जना पर्यटक नेपाल आए । यो अघिल्लो वर्षको १० महिनाको तुलनामा मात्र ८ प्रतिशतले बढी हो ।
सन् २०१८ को १० महिनामा ९ लाख ३ हजार ५ सय ३९ जना पर्यटक नेपाल भ्रमणमा आएका थिए । कूल पर्यटकमध्ये हवाइमार्गबाट ८ लाख २० हजार ४ सय ९९ र स्थलमार्गबाट एक लाख ५५ हजार ५८ जना पर्यटक भित्रिएका छन् । स्थलमार्गबाट भित्रिने भारतीय नागरिक भने नेपालमा पर्यटकको गणनामा पर्दैनन् ।
१० महिनाको पर्यटक आगमन तथ्यांक केलाउँदा यूरोप र अमेरिकी मुलुकबाट हुने पर्यटक आगमन सुस्त देखिएको छ । १० महिनामा यूरोपेली मुलुकबाट १ लाख ९९ हजार ३ जना पर्यटक भित्रिए । गत वर्ष १ लाख ९८ हजार ४ सय ९३ जना पर्यटक नेपाल आएका थिए । अमेरिका र क्यानडाबाट ९२ हजार २ सय ७२ जना मात्र पर्यटक भित्रिए ।
गत वर्ष ८८ हजार २ सय ८६ जना भित्रिएका थिए । एसियाली क्षेत्रबाट भने केही पर्यटक बढेका छन् । खासगरी चाइनिज ताइपेई र थाइल्याण्डबाट क्रमशः ३९.५ र ३२.९ प्रतिशत बढी पर्यटक आएको आंकडाले देखाएको छ । ताइपेईबाट ११ हजार ३ सय ८४ र थाइल्याण्डबाट ३९ हजार ६ सय ८ जना पर्यटक नेपाल भ्रमणमा आएका छन् ।
१० महिनामा कुन क्षेत्रबाट कति पर्यटक आए ?
क्षेत्र | सन् २०१८ | सन् २०१९ | वृद्धि प्रतिशत |
सार्क | २४०१०० | २५०२४३ | ४.२ |
एसिया (सार्कबाहेक) | २३३५६२ | २५९४४५ | ११.१ |
यूरोप | १९८४९३ | १९९००३ | ०.३ |
आसियाना | ३३०८२ | ३४८५८ | ५.४ |
अमेरिकी मुलुक | ८८२८६ | ९२२७२ | ५.४ |
अन्य | ११००१६ | १३६७७८ | १४.०२ |
कूल | ९०३५३९ | ९७५५५७ | ८ |
स्रोत : नेपाल पर्यटन बोर्ड