२७ कात्तिक, काठमाडौं । सीमा विवाद र बंगलादेशी राष्ट्रपति मोहम्मद अब्दुल हमिदको भ्रमण आजका दैनिक पत्रिकाहरूको पहिलो प्राथमिकतामा परेको छ । यसबाहेक, गोविन्द केसीको अनशन, मानव तस्करीलगायत विषयलाई पनि पत्रपत्रिकाहरूले उठाएका छन् ।
पुस्ता–पुस्तामा देखिएको सेल्फी मोह झल्किने तस्वीर छापेको कान्तिपुरले मलाबीमा बन्धक बनाइएका नेपालीबारे मुख्य समाचार बनाएको छ । त्यस्तै प्रधानमन्त्री केपी शर्मा ओलीको गृहनगर दमकमा २५ तले भ्युटावर निर्माणमा सुरु भएको अर्को खबर पनि कान्तिपुरमा पढ्न सकिन्छ । संघीय सरकारअन्तर्गतको सघन सहरी विकास तथा भवन आयोजना कार्यालयले १ अर्ब ५४ करोड १४ लाख ३९ हजार १ सय ६४ रुपैयाँमा ठेक्का दिएर दमक नगरपालिका ३ दापगाछीमा टावर निर्माण अघि बढाएको हो ।
२५ तले टावरमा अन्डरग्राउन्ड पार्किङ, व्यावसायिक पसल, हल र कर्पोरेट कार्याललयहरू रहने छन् । त्यस्तै आसपासमा बगैंचा, पोखरी र बालउद्यान बनाइने छ ।
दमकमा भ्यु तावर बन्न लागे पनि स्थानीय भने खुसी छैनन् । यतिका रकम खर्चेर अन्य उपयोगी काम गरेको भए हुने उनीहरूको भनाइ छ ।
स्थानीय युवा पर्शुराम रिजालले दमकमा सुविधासम्पन्न अस्पतालको आवश्यकता औंल्याएका छन् ।
सांसद्हरूले अमेरिकी टोलीसँग ट्याक्सी चढ्ने पैसा नभएको भनेर गरेको गुनासोलाई आज राजधानीले छापेको छ । अमेरिकी अन्तर्राष्ट्रिय संस्था हाउस डेमोक्रेसी फ्रेन्डसिप (एचडीपी) को सहयोगमा संघीय संसद् सचिवालयले आयोजना गरेको अनुभव अदानप्रदान कार्यक्रममा सांसदहरूले आफूहरूसँग ट्याक्सी चढ्ने पैसा नै ननहुने गुनासो गरेका हुन् ।
नेपाली सांसदको अनुभव र भोगाइ सुनाउने क्रममा आफूहरूको अवस्था दयनीय रहेको नेपालका सांसदहरूले गुनासो गरेको समाचारमा उल्लेख छ । राजधानीका अनुसार, सांसद् माया ज्ञवालीले नेपालका सांसदसँग ट्याक्सी चढ्ने पैसासमेत नहुने बताएकी थिइन् । यति मात्रै होइन, उनले सांसदलाई साधन स्रोत केही नभएको, अहिलेसम्म अमेरिका नदेखेकोजस्ता गुनासो पोखेकी थिइन् ।
त्यस्तै सांसद् लक्ष्मी परियारले नेपालमा प्रत्यक्ष निर्वाचित सांसदलाई सरकारले प्राथमिकतामा राखे पनि समानुपातिकलाई विभेद गरेको गुनासो गरेकी थिइन् ।
अन्नपूर्णले ३९५ वर्ग किमि नेपाली भूमि अतिक्रमणमा परेकाे लेखेकाे छ भने गाेरखापत्रले रुख काट्ने विवादले नारायणगढ मुग्लिन सडक निर्माण प्रभावित भएकाेलगायत समाचार छापेकाे छ ।
