१ मंसिर, काठमाडौं । आन्तरिकतर्फका हवाई उडान ढिलो हुँदा त्रिभुवन विमानस्थलमा यात्रुहरु मर्कामा परेका छन् । पूर्वनिर्धारित समयभन्दा डेढ–दुई घण्टासम्म उडान ढिला हुँदा आन्तरिक टर्मिनलमा यात्रुहरुको घुइँचो लागेको छ ।
आइतबार बिहानैदेखि अधिकांश एयरलाइन्सका उडान समयमा सुरु भएका छैनन् । विमान कम्पनीहरुले विहान कुहिरो लागेकाले उडान ढिलो भएको र त्यसको प्रभाव पछिल्ला उडानहरुमा पनि परेको दाबी गरेका छन् । आन्तरिक हवाई टर्मिनलमा खटिएका बिभिन्न एयरलाइन्सका कर्मचारीहरुले यात्रुहरुलाई मौसम अनुकुल नभएकाले उडान ढिलो भएको जवाफ दिने गरेका छन् ।
तर, विमानस्थल परिसरमै रहेको मौसम विज्ञान विभागका मौसमविदले भने उडान नै प्रभावित हुने गरी देशको कुनै पनि स्थानमा कुहिरो नलागेको बताए । मौसमविद वरुण पौडेलले अनलाइनखबरसँग भने, ‘विहानमा अलि–अलि कुहिरो लाग्न सक्छ तर त्यो एकैछिनमा उडेर गइहाल्छ । उडान नै रोकिने गरी बाक्लो हुस्सु कुहिरो अझै सुरु भएको छैन ।’
मौसमविदका अनुसार नेपालमा समान्यतया डिसेम्बर महिनाको मध्यदेखि र जनवरी महिनाभर हुस्सु लाग्ने, शितलहर चल्ने र बढी जाडो हुने गर्छ । आज नोभेम्बर महिनाको १७ तारिख हो । त्यसैले अझैसम्म हवाई उडान नै प्रभावित हुने खालको मौसमी प्रणाली देशभर कतै पनि विकसित नभएको मौसमविद पौडेलले बताए । ‘तापक्रम अहिले पनि १०–११ डिग्री सेल्सियस छ, शितलहर चल्ने बाक्लो हुस्सु लाग्ने बेलामा तापक्रम २–३ डिग्रीसम्म पुग्छ,’ मौसमविद पौडेलले भने, ‘त्यतिबेला पश्चिमतिरबाट पानी पर्ने प्रणाली पनि भित्रिन्छ ।’