माथिमाथि शैलुङ्गेमा चौरी डुलाउनेलाई
हत्केलामा मायाको गुराँस फुलाउनेलाई

गीतका हरफरहरु जति रसिक छ, त्यो भन्दा कम छैन शैलुङको भू-बनौट । त्यो चुचुरोमा उभिएर हेर्दा देखिने हिमालका श्रृखला, हिउँले सेताम्मे थुम्का-थुम्का । शैलुङमा यस्ता थुम्का सयवटा छन् । यस्तो लाग्छ, पौराणिक कथाहरुमा वर्णन गरिने स्वर्ग यस्तै पो हो कि ?

रामेछाप र दोलखाको सीमावर्ती भु-भाग हो, शैलुङ । समुन्द्री सतहबाट ३ हजार १ सय मिटर अग्लाईमा रहेको शैलुङ महाभारत रेन्जको सबैभन्दा उचाइमा रहेका स्थलमध्ये एक हो ।

शैलुङसम्म उक्लनका लागि कुनैपनि सिजन अनुकुल हुन्छ । यतिबेला पुग्ने हो भने सबैतिर हिउँ नै हिउँले ढाकिएको छ । हिउँमा रमाउनेहरुका लागि उपयुक्त मौका हो यो । यो समयमा शैलुङ्गमा स्की खेल्नका लागि पनी उपयुक्त हुने प्रशिक्षक छिरीङ्ग जाडबु शेर्पा बताउँछन् ।

त्यसो त चैत-वैशाखमा पनि यहाँको रौनक कम हुँदैन । भदौ-असोजमा चाहि शैलुङ फूलले ढकमक्क सिंगारिएको हुन्छ ।

शैलुङको प्राकृतिक सौन्दर्य त छँदैछ, धार्मिक आस्थाको केन्द्र पनि हो । शैलुङलाई हिन्दु र बौद्ध धर्मावलम्बीहरुको साझा तीर्थस्थल मानिन्छ । यो जडिबुटीको अथाह भण्डार हो । शैलुङ स्थानियवासीको चौरीको चरन क्षेत्र पनि हो ।

शैलुङ क्षेत्र रामेछापको दोरम्बा, दोलखाको शैलुङ, मेलुङ्ग गाउँपालिकाभित्र पर्छ । शैलङ क्षेत्रबाट सगरमाथा लगायत दर्जनौं हिमालहरु आँखै अगाडि देख्न सकिन्छ । यहाँबाट देखिने सबैभन्दा आकर्षक दृश्यभ ने, गौरीशंखर हिमालको हो ।

कसरी पुग्ने

काठमडौबाट नेपालथोक, दोरम्वा हुँदै शैलुङ्ग पुगिन्छ । यसको दूरी १ सय २१ किमी छ । यसैगरी काठमाडौंबाट खाडीचौर, मुडे हुदै शैलुङ्ग पुगिन्छ । यसको दूरी १ सय ३१ किमी रहेको छ ।