Comments Add Comment

शिवराज श्रेष्ठको पुनर्वहालीले गभर्नरको रेसमा ‘गेम चेञ्ज’

६ माघ, काठमाडौं । नेपाल राष्ट्र बैंकका गभर्नर डा. चिरञ्जीवी नेपाल आफ्नो ५ वर्षे कार्यकाल पूरा गर्दै आउँदो चैतमा अवकाश पाउँदैछन् । कार्यकाल सकिनु एक महिनाअगावै बिदा लिएर बस्न सक्ने प्रावधान भएका कारण राष्ट्र बैंकको काम कारबाहीबाट भने उनी फागुनमै बाहिरिन सक्छन् ।

त्यस अवधिमा सरकारले राष्ट्र बैंकमा नयाँ गभर्नर नियुक्ति गर्नु पर्नेछ । गभर्नरको कार्यकाल बाँकी ३ महिना पनि नरहेको अवस्थामा यतिबेला गभर्नर नियुक्तिका लागि राजनीतिक दौडधुपहरु तीव्र भएको छ ।

गभर्नरको आकांक्षीका रुपमा देखिएकाहरु यतिबेला शक्तिकेन्द्रको शरणमा पुगेका छन् । यही बेला अनियमितताको आरोप लागेका डेपुटी भगर्नर शिवराज श्रेष्ठको पुनर्वहालीले नयाँ परिस्थिति विकास भएको छ ।

श्रेष्ठले अनियमितता गरेको भन्दै छानबिन भएकोमा मन्त्रिपरिषद्ले निर्णय नै गरेर उनलाई सफाइ दिएको छ । श्रेष्ठको पुनर्वहालीसँगै गभर्नर बन्ने रेसमा सामेल भएका छन् ।

गभर्नरको प्रवल दाबेदार भनेको बहालवाला डेपुटी गभर्नरहरु नै हुन्छन् । गभर्नर नियुक्तिका लागि अर्थमन्त्रालयले ३ जनाको नाम मन्त्रिपरिषदमा सिफारिस गर्नु पर्ने र त्यसमा एकजना बहालवाला डेपुटी गभर्नर हुनै पर्ने बाध्यकारी व्यवस्था छ ।

डेपुटी गभर्नर श्रेष्ठको पुनर्वहाली नभएको भए चिन्तामणि शिवाकोटी स्वतः सिफारिस हुने थिए । तर श्रेष्ठको पुनर्वहालीसँगै सिफारिसमा को पर्लान् भन्ने द्विविधा देखिएको छ । चिन्तामणि नेकपा त्यसमा पनि पूर्वएमाले निकट व्यक्ति हुन् भने शिवराज नेपाली कांग्रेस निकट ।

तर शिवराज प्रधानमन्त्री केपी ओलीकी श्रीमती राधिका शाक्यसँग नजिक रहेको श्रोत बताउँछ । त्यसैले उनको दावेदारी कमजोर छैन । एक हिसाबले श्रेष्ठको पुनर्वहालीसँगै ‘गेम चेन्ज’ भएको छ ।

नयाँ गभर्नरमा कसको सम्भावना ?

अहिले गभर्नरको मुख्य दाबेदारको रुपमा वरिष्ठ डेपुटी गभर्नर चिन्तामणि सिवाकोटी देखिएका छन् । उनीसहित राष्ट्र बैंककै पूर्वडेपुटी गभर्नर तथा लगानी बोर्डका प्रमुख कार्यकारी अधिकृत महाप्रसाद अधिकारी, राष्ट्र बैंककै पूर्वकार्यकारी निर्देशकद्वय मीनबहादुर श्रेष्ठ, भाष्करमणि ज्ञवालीलगायत छन् ।

उता पुनर्वहाली भएसँगै डेपुटी गभर्नर श्रेष्ठले अब आफू गभर्नर बन्ने सञ्चारमाध्यमहरुलाई प्रतिक्रिया दिएका छन् । आफूविपरुद्ध छानबिन समिति गठन हुनुपूर्व नै उनलेउ आफू गभर्नरको दाबेदार भएको बताएका थिए । गभर्नर हुनबाट रोक्नकै लागि आफूलाई फसाउन खोजिएको उनको दाबी थियो ।

अर्थमन्त्री डा. युवराज खतिवडा भने बहालबाला अर्थसचिव डा. राजन खनाललाई गभर्नर बनाउने पक्षमा रहेको स्रोतले बताएको छ ।

कांग्रेसनिकट गभर्नर नेपालसँग राम्रो सम्बन्ध नभएका अर्थमन्त्री अब आफ्नो अनुकुल व्यक्तिलाई सो पदमा ल्याउन चाहन्छन् ।

स्रोतका अनुसार आफूलाई धेरै सहयोग गरेका कारण खनाललाई उनले गभर्नर बनाउने आश्वासनसमेत दिएका छन् । तर खनाल आफैले चाहिँ आफू गभर्नरको दाबेदार नभएको बताएका छन् ।

उता लगानी बोर्डका सीईओ अधिकारी अघिल्लोपटक पनि गभर्नरको बन्ने लाइनमा थिए । यसपाली पनि उनी आशावादी बनेका छन् ।

अर्का प्रवल दाबेदार मिनबहादुर श्रेष्ठ हुन् । उनी पूर्वमाओवादी निकट मानिन्छन् । यदि गभर्नर पूर्वमाओवादीको कोटामा परे मिनबहादुरकै भाग्य चम्कने श्रोत बताउँछ ।

गभर्नरको आकांक्षीका रुपमा हेरिएका भाष्करमणि नेताहरुको नजिक छैनन् । यसकारण उनको सम्भावना अत्यन्तै कम रहेको अर्थका अधिकारीहरु बताउँछन् ।

‘सिफारिसमा केही समस्या हुने त देखियो तर सिवाकोटीजी कोसम्भावना अधिक छ’ नेकपाका एक नेताले भने, ‘यदि पूर्वमाओवादीको कोटामा पर्‍यो वा ठूलै चलखेल भएन भने अबको गभर्नर सिवाकोटी नै हुन् ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment