२७ फागुन, काठमाडौं । आपसी विवादको क्रममा महिलामाथि खुकुरी प्रहार गरेको आरोपमा काठमाडौंको नागार्जुन नगरपालिका–९ बाट प्रहरीले दुई जनालाई पक्राउ गरेको छ ।
पक्राउ पर्नेमा धनकुटा त्वाल्छा छिन्ताङ शहीद थुम घर भई काठमाडौंको स्युचाटार बस्ने २१ वर्षीया लक्ष्मी थापा मगर र ५७ वर्षीय हेमबहादुर थापा मगर रहेका छन् ।
आपसी विवादका क्रममा सोही ठाउँ बस्ने एक महिलामाथि उनीहरुले आइतबार धारिलो हतियार खुकुरी प्रहार गरेको प्रहरीले जनाएको छ ।
दुबै जनालाई नियन्त्रणमा लिएर थप अनुसन्धान भइरहेको प्रहरीले जनाएको छ ।
खुकुरी बोक्ने एक जना पक्राउ
प्रहरीले काठमाडौंको जमलबाट धारिलो हतियारसहित एक जनालाई नियन्त्रणमा लिएको छ ।
महानगरीय प्रहरी वृत्त दरबारमार्गबाट खटिएको प्रहरी टोलीले रामेछाप घर भई काठमाडौंको जडिबुट्टी बस्ने २१ वर्षीय सुनिल कार्कीलाई पक्राउ गरेको हो ।
शंकास्पद रुपमा हिँडिरहेको अवस्थामा चेकजाँच गर्दा उनको साथबाट एक थान खुकुरी बरामद भएको प्रहरीले जनाएको छ ।
कार्कीलाई नियन्त्रणमा लिएर थप अनुसन्धान भइरहेको प्रहरीले जनाएको छ ।