कोरोना
मात्र सूक्ष्म जीवाणु हो
जसका कारण यहाँ
हजारौं मरिरहेछन्
लाखौं सक्रमित छन्
करोडौं त्रासमा बाँचिरहेछन्
विश्व नै अस्तव्यस्त छ,
पुँजीवाद
अस्ताइरहेछ,
आणविक हतियारले होइन
जीवाणुको हतियारले
विश्व पछुताइरहेछ
तर, एउटा श्रमिक डेरावाललाई
कसरी यो महिनाको
भाडा तिर्ने भन्ने पिरले सताइरहेछ !
ए घरबेटी बा !
आपत विपदको बेला
ढुंगा त रसाएको हुन्छ
तपाईंको मन त
साह्रै कमलो छ
जो आदर्श देख्छ
विश्वास श्रद्धा र
भक्तिमा अडेको छ,
त्यसैले त एउटै
आह्वान छ
एक महिनाको भाडा
मिनाहा गरिदिनुस्
जो
श्रममा बाँचेका छन्
जो आफ्नै हातले उमार्छन्
गोड्दछन्
फलाउँछन् र खान्छन् !
ती र त्यस्ता महान्
व्यक्तिहरु
जसले पृथ्वी
कोर्नु बाट्नु सिङ्गार्नु
आफ्नो कर्तव्य ठान्छन् !
यी श्रमिकहरुको
मन रित्तो रित्तो
बनाएर कसरी
आफ्नो ढुकुटी भर्न
सक्नुहुन्छ र ? घरबेटी बा !
तपाईं एउटा
घरबेटी होइन
साथी भएर सम्झिनुस्
कामबाट फुर्सद मिलेपछि
सँगै पिँढीमा बसेर
टीका टिप्पणी र
गफ्फिने मान्छे
पो हो त डेरावाल,
तपाईं
छोराकोमा बस्न
अमेरिका जाँदा
महिनौं
सुरक्षित तवरले
घर कुरिदिने मान्छे पो
हो त डेरावाल,
आफू गाउँ जाँदा
मीठो मसिनो
घिउ मह
कोसेलीमा ल्याउँदा
हजुरलाई नखुवाई
आफू नचाख्ने
मान्छे पो हो त
डेरावाल,
घरको मिटर बिग्रिँदा
पानीको कल बिग्रिँदा
तिहारमा झिलिमिली
पार्नु पर्दा
सम्झिनुस् त
तपाईंको साथी को थियो ?
उही त हो नी डेरावाल!
अझ
तपाईंको बाबा
सिकिस्तै भएर
वीर अस्पतालमा भर्ना हुँदा
आफ्ना काम छोडी छोडी
बिरामी कुरुवा बन्ने पनि
त उही डेरावाल थियो नि !
आज
कसरी त्यही मनकारी
डेरावाललाई ऋणमा डुबाएर
तपाईं कोरोना भाइरससँगको
युद्ध जित्न सक्नुहुन्छ?
भन्छन्
मानिस भित्रै
स्वर्ग न नरक हुन्छ,
भन्ने हो भने
तपाईं भित्रको
स्वर्ग मात्र देखेको छ
डेरावाल ले अहिलेसम्म !
मानिसहरु
यस्तै अभावहरुमा
अत्यचार गर्न खोज्छन्
भ्रष्टाचार गर्न खोज्छन्
न दण्ड दिने ऐन
न मानवीय चेतना
मात्र
एउटा अध्यारो कोठरीको
परीक्षा जस्तो
जसले मानवता बुझ्यो
उसले उज्यालो भेट्यो!
त्यहाँ आँसुको पनि काम छैन
जहाँ हृदय पग्लिँदैन
अमृत पिएर विष ओकल्नेहरु
सत्य पक्रिएर मिथ्या फलाक्नेहरु
आफू असहयोग गर्ने
र चमत्कार खोज्नेहरु;
यी मान्छे प्रवृत्ति
भन्दा फरक भएर निस्किनुस्
प्रिय घरबेटी बा !
तपाईं एक महिनाको
भाडा नलिएर
नाङ्गो बन्नु हुन्न
तर, डेरावालाको
मनमा सदासदा बास गर्नु हुनेछ।
ए घरबेटी बा !
संकुचित हृदयमा
ज्यादा घमण्ड लिएर
होइन
सानातिना हिसाबहरुमा
मोलतोल गरेर होइन
मनको विशाल बनावटमा
डेरावालको सानो खुशीका
लागि ठाँउ दिनुहोस् !
धनको पुजारी होइन
मनको भक्त भएर
कोरोना भाइरसविरुद्धको
लडाइँमा सरकारलाई
सहयोग गरिदिनुहोस् !
