भलै अहिले मान्छेले घडी बाँध्ने कुरा सामान्य भइसकेको छ। तर, कुनै समय यस्तो थियो, जहाँ केवल ठूलाबडा तथा धनी मानिसहरूसँग मात्र घडी हुन्थ्यो र आफूसँग घडी हुनुलाई मानिसहरू आफ्नो प्रतिष्ठासँग जोड्दथे ।
जुन घडी अहिले सामान्यभन्दा पनि सामान्य मानिसको पहुँचमा छ। त्यो दुनियाँमा सबैभन्दा पहिलो कसले बनायो होला ? अनि दुनियाँमा पहिलोपटक बनेको घडी कस्तो थियो होला ? यो कुरा जान्ने चाहना सायद तपाईंमा पनि छ होला ।
वास्तवमा दुनियाँको पहिलो घडीसम्बन्धी तथ्यहरू निकै रोचक छन् । आजभन्दा करिब पाँच सय १५ वर्षअघि अर्थात् सन् १५०५ मा विश्वमा पहिलोपटक घडी बनेको थियो ।
दुनियाँको पहिलो घडीको नाम पोमेन्डर वाच अफ १५०५ अर्थात् वाच १५०५ को नामले चिनिन्छ । जर्मन आविष्कारक पिटर हेनलेनले उक्त घडी निर्माण गरेका हुन् । उनलाई नै घडीका जन्मदाता भनिन्छ ।
आकारमा स्याउको दानाजस्तै देखिने उक्त घडीको तस्वीरलाई विश्वले देख्न पाएको चाहिँ धेरै भएको छैन ।
सन् १९८७ मा बेलायको लण्डनस्थित एक कवाडी बजारबाट एकजना घडी मर्मत गर्ने पसलेले उक्त पोमेन्डर घडी खरिद गरे । उनले सो घडी १० पाउण्डमा किनेका थिए ।
निकै अनौठो खालको डिजाइन भएका कारण उनले ‘कवाडी बजार’बाट उक्त घडी किनेका थिए । त्यो घडी विश्वकै पहिलो घडी हो भन्ने कुरा उनलाई थाहा थिएन ।
उनले कैयन् वर्षसम्म उक्त घडीलाई आफूसँग राखे र अन्ततः सन् २००२ मा बिक्री गरे । ती युवकबाट त्यो घडी किन्ने अर्को मान्छेलाई पनि त्यो घडी दुनियाँकै पहिलो घडी हो भन्ने कुरा थाहा थिएन । दोस्रो व्यक्तिले पनि उक्त घडी अर्को मान्छेलाई बेचिदिए ।
यस्तै बिक्री हुने सिलसिलामा उक्त घडी एकजना शोधकर्ता विद्यार्थीको हात पर्यो । उनले नै उक्त घडी विश्वकै पहिलो घडी भएको कुरा दुनियाँलाई जानकारी गराए ।
उक्त घडीमा त्यसको निर्माण भएको वर्ष पनि लेखिएको थियो र आविष्कारक पिटर हेनलेनको हस्ताक्षर समेत थियो । समाचारअनुसार सो घडी निर्माता पिटर हेनलेनको निजी घडी थियो, जुन उनले सधैं आफूसँगै राख्थे ।
दुनियाँको यो पहिलो घडी तामा र सुनबाट बनेको छ ।
अहिलेको समयमा यो घडीको मूल्य आठ करोड डलर अर्थात् झण्डै १० अर्ब नेपाली रुपैयाँ पर्ने बताइएको छ । अमेरिकाको चर्चित एन्टिक विक म्यागेजिनले सन् २०१४ मै सो घडीको मूल्यका बारेमा खुलासा गरेको थियो ।
उक्त घडी अहिले कोसँग छ भन्ने कुरा चाहिँ गोप्य राखिएको छ । एजेन्सी