अलि बिस्तारै हिँड
दुरी बढाएर
अँह हात नमिलाउ
चुम्बन ! त्यो त गर्दै नगर ,
अन्कमाल नगर
नतिजा के हुन्छ , तिमीलाई थाहा छ ।
बरु टाढैबाट नमन गर
त्यो जस्तो सुकै किन नहोस ।
तिम्रो मनमा प्रश्न उठछ होला, किन ?
रिस उठछ होला, किन ?
तर तिम्रो झिनो रिसको सामु
मेरो प्रकृति रिसको तुलना हुन सक्दैन
कृपया शान्त बस , घरमै बस ।
अहिले म रिसाएकी छु,
मलाइ सतहमा आउन समय लाग्छ ।
निरास नहोउ
के होला कसो होला भनेर
जन्म र मृत्यु तिम्रो हातमा हिजो पनि थिएन
आज पनि छैन र हुँदैन ।
सक्छौ भने यो बुझ्ने कोसिस गर
हरेक घटनाले राम्रो नराम्रो अवसर दिन्छ
जुन समान हुन्छ ।
जसरी म आफूलाई स्वच्छ गरिरहेछु
त्यसरी तिमी पनि स्वच्छ बनाउ आफुलाई
अनि म शान्त हुनेछु ।
त्यसपछि हामी मिलिजुली बाँचौला
म तिमीलाई निश्चल प्राण दिनेछु
तिमी मेरो रक्षा गर
तिमीले मेरो बिनास गरिरहँदा
म मात्रै हैन यो सारा सृष्टि बिनास भइरहेको हुन्छ ।
त्यसमा तिमी अछुतो रहन सक्दैनौ
बरु आउ मलाई प्रेमले अङ्गाल
मेरो अस्थित्वमा भएको सारा कुरा
तिम्रै लागि त हो
डाली सुम्सुम्याउ
फुलको वासना अनुभव गर
बिल्कुलै निस्वार्थ भावमा
तर चुँड्न नखोज, भाँच्न नखोज
फोहोर नगर
मलाइ दु:खी बनाएर तिमी कुन खुसी खोज्दछौ
तिम्रो म भन्नु पनि म नै हुँ ।
मलाई बुझ ।