२६ वैशाख, काठमाडौं । कोरोना भाइरसको विश्वब्यापी महामारीका बीच दक्षिण कोरियाले घरेलु फुटबल लिग सुरु गरेको छ ।
शुक्रबारदेखि सुरु भएको कोरियाली लिग कोरोना महामारीका बेला विश्व फुटबल कस्तो हुन्छ भनेर बुझ्न पाठ बन्ने बीबीसीले उल्लेख गरेको छ । शुक्रबार भएको खेलमा जेनबुक मोटर्सले सुवन ब्लुविङ्सलाई १-० ले पराजित गरेको छ ।
फुटबल खेल हुँदा मैदानका खेलाडीबाहेक बेन्चमा रहेका खेलाडी, प्रशिक्षक र अफिसियलले मास्क लगाएका थिए । खेलका क्रममा खेलाडीहरुले हात मिलाएनन् ।
मैदानमा नजिकै थुक्न र कुरा गर्न रोक लगाइएको थियो ।
पेनाल्टी र रातो कार्डबारे निर्णय गर्न भिडियो असिस्टेन्ट रेफ्री (भीएआर) को सहायता पनि लिइएको थियो ।