२४ असार, चितवन । चितवनको भरतपुर महानगरपालिका–२१ पहारिलोटारमा रहेको भानु माविको प्रशासनिक तथा पुस्तकालय भवन निर्माण पूरा भएको छ ।
भवनको वुधबार एक कार्यक्रमका बीच भरतपुर महानगर प्रमुख रेनु दाहालले उद्घाटन गरिन् ।
भरतपुर महानगरपालिका, बागमती प्रदेश सामाजिक विकास मन्त्रालय र डीएलपीआईको एक करोड ४६ लाख रुपैयाँको लागतमा चार कोठे आधुनिक प्रशासनिक भवन र पुस्तकालय निर्माण गरिएको हो ।
विद्यालयले अघिल्लो बर्ष महायज्ञसमेत लगाएर रकम संकलन गरेको थियो । भवन उद्घाटन कार्यक्रममा बोल्दै महानगर प्रमुख दाहालले भरतपुरलाई शैक्षिक हबको रुपमा विकास गर्दै अगाडि बढ्ने बताइन् ।
चालु आर्थिक वर्ष २०७६/७७ मा संघ, प्रदेश र महानगरको लगानीमा शिक्षा क्षेत्रको समग्र विकासमा १८ करोड रुपैयाँभन्दा बढी बजेट परिचालन गरिएको जानकारी दिँदै उनले आगामी आर्थिक वर्षहरुमा शिक्षालाई प्राथमिकतामा राखिएको बताइन् ।
भरतपुर–२१ का अध्यक्ष चित्रसेन अधिकारीले विद्यालयको नवनिर्मित भवनसँगै शैक्षिक वातावरण विकासमा थप टेवा पुग्ने बताए ।
यो पनि पढ्नुहोस युवा नेतृत्वमा बुढो विद्यालयको कायापलटपार्वतीपुरको स्वास्थ्य चौकी शिलान्यास
महानगर प्रमुख रेनु दाहालले सोही वडामा स्वास्थ्य चौकी पार्वतीपुरको नयाँ भवनको शिलान्यास गरेकी छिन् । चार सय वर्ग मिटर क्षेत्रफलमा निर्माण हुने दुई तले भवनमा अत्याधुनिक सुविधाहरु समेत रहनेछन् ।
सो भवन आगामी मंसिरभित्र सम्पन्न गर्नेगरी ७९ लाख ७६ हजार ९९१ रुपैयाँमा ठेक्का सम्झौता भएको भरतपुर महानगरपालिकाका इन्जिनियर सन्तोष आचार्यले जानकारी दिए ।