२९ मंसिर, चितवन । नेपाली कांग्रेसका नेता रामशरण महतले सत्तारुढ नेपाल कम्युनिस्ट पार्टी (नेकपा)को आन्तरिक झगडाले मिलेनियम च्यालेन्ज कर्पोरेशन (एमसीसी) सम्झौता संसदबाट पास हुन नसकेको बताएका छन् ।
चितवनको नारायणगढमा आयोजित सरकार विरोधी सभामा नेता महतले कांग्रेस सरकारको पालामा भएको एमसीसी सम्झौता कार्यान्वयनमा सरकार दृढ नभएको बताए । ‘शेरबहादुर देउवा नेतृत्वको सरकारले गरेको एमसीसी सम्झौता संसदबाट पास हुनपर्छ,’ पूर्वअर्थमन्त्री समेत रहेका महतले भने, ‘एमसीसी पास भए अमेरीकी सेना आउँछ भन्नु सरासर झुट प्रचार गरिएको छ । कसैलाई गाली गरेर देशको विकास हुँदैन ।’
विद्युत लाइन विस्तार र सडकका लागि ५० करोड डलर सहायता आउन लागेकाले विरोध गर्न उचित नभएको उनले बताए ।
नेता महतले भारतसँग वार्ता गरेर सीमा समस्या समाधान गर्नुपर्ने बताए । चीनले नेपालका विभिन्न ठाँउमा सीमा मिचेका खबरहरु आएपनि सरकारले थाहा नपाए जस्तो गरेको उनले बताए ।
‘हुम्ला, गोरखा, दोलखा, सोलुखुम्बु लगायतका जिल्लामा चीनले सीमा मिचेका कुराहरु आइरहेका छन्, यसको निष्पक्ष छानविन गरेर जनतालाई जानकारी गराउनुपर्छ’ उनले भने ।
जनता कोभिडको मारका रहेका बेला समेत सरकार भष्ट्राचार गर्न उद्धत रहेको उनको आरोप छ । जनजीविका सवाललाई सम्वोधन गर्नुभन्दा सरकार ठूला कुरा गर्ने, तर परिणाम देखाउन नसक्ने अवस्थामा पुगेको महतका दाबी छ ।
भरतपुरको चौबिसकोठी, क्याम्पसगेट, लायन्सचोक, सहिदचोकमा नाराबाजीसहित निस्किएको जुलस पुल्चोकमा पुगेर सभामा परिणत भएको थियो ।
